Albisteak
Dena prest 5. Garagardo Azokarako
— 2016-08-23Ostegun honetan, abuztuak 25, hasiko da Zestoako 5. Garagardo Azoka. Astindu eta Txoko Feministako hainbat kidek garagardo azokako egitaraua aurkeztu dute eta herritarrei bertara inguratzeko deia egin diete.
Beheko argazkian ikus dezakezue Garagardo Azokako egitaraua. Astindu eta Txoko Feministako kideek honako ohar hau kaleratu dute:
Zestoako V. Garagardo Azoka aurten Zestoako Txoko Feminista eta Astindu taldeek antolatuko dugu elkarlanean. Lehen ere toki batean baino gehiagotan egin dugu topo: dela herriko eragileen arteko mahai-inguruan, “baloreen” zuhaitz landaketan edo Herri Azokaren antolaketan. Urtebete baino gutxiago da bi taldeak sortu zirela, eta pixkanaka ekin diogu bideari, gogotsu, herriari aukera berriak eskaintzeko asmoz. Atzera begiratuta gustura gaude egindako lanarekin, baina ez gara horrekin konformatzen eta etorkizuneko pausuak ditugu buruan.
Datorren urterako ekintzak prestatzeko formula ona iruditu zaigu auzolanean Garagardo Azoka antolatzea. Batetik, talde bakarrarentzat seguru asko karga handia izango litzateke muntaia guztia, eta bestetik, orain auzolanean antolatzeak aurrera begira ate berriak irekiko dizkigu bi taldeok elkarlanarekin jarraitzeko.
Bildutako diruarekin poltsa bat osatuko dugu Astinduk eta Txoko Feministak, baina helburu jakinak markatu eta irailetik aurrerako egitaraua prestatzea da erronka; agenda feminista, sozial, kultural eta anitza eskaintzea. Buruan darabiltzagu dagoeneko hainbat ekintza zehatz, autodefentsa feminista ikastaroa edo energiaren eta eredu sozialaren inguruko hitzaldi zikloa, adibidez. Baina pixkanaka joango gara fintzen hauek ere.
Abuztuaren 25etik 28ra Garagardo Azokan ikusiko dugu elkar.
Egin zaitez bazkide