Azken bi urte hauetan ez ditugu normaltasunez ospatu  Amabirjina jaiak Aizarnan. Birusa dela eta, mesfidantza izan da  nagusi, bai  parte hartzeko garaian eta antolatzerakoan zer esanik ez.  Kontsolatzeko pentsatu behar, beste herriek ere arazo bera izan dutela arlo honetan.

Dena den, gainditu ditugula ematen du  izurritearen arazoak eta   aspaldian ikusi diren  jai jendetsuenak ikusten ari gara, inguruko  herrietan. Badirudi   jai giroan murgiltzeko zain zegoela jendea,  gazte edo adinekoa izan. 

Egoera  berrira  itzuli eta Aizarnan ere antolatu dira Amabirjinak eta  beste herrietan  bezala    hemen ere, parte hartzea   bikaina izan dela esango nuke. Ekintza gehienetara  ikusle kopuru polita hurbildu  zen, inguruko herrietako  jende multzoa ikusten zen Aizarnako plazan.

Dena den, utzi diezaiodan  jaien testuinguru honi  begiratzeari eta egin diezaiedan begirada bat  Aizarnakoei.

“Etxafuegoa” bota bezain azkar denak pilotalekura hurbildu ginen. Bertan lau pilotari gazte lehian eta hauetako bi oso ezagunak Aizarnan, Urtzi Egiguren eta bere anaia Aimar.  Pilota partidak amaitzerako prest  zegoen afaria  plazan, giro atsegina  sumatu nuen bertan. Ondoren musikarekin gozatu zuten mahaiko jankide guztiek.

Bigarren eguna umeentzako zegoen antolatuta.  Egun osoa jolasten igaro zuten  txikiek, eta hain txikiak ez zirenak ere baziren tartean, plazan egin zuten bazkariko denbora izan ezik. 

Hirugarren egunean meza nagusia eta ondoren iragarrita zegoen bezala  paella lehiaketa. Emaitzak ikusi eta   badirudi sukaldaritzan maila polita dagoela Aizarnan. Itxura eta zapore ederra zuten  paella hauek. Bi taldeen artean puntu berdinketa gertatu zen eta   epai mahaiak berriz eztabaidatu ondoren,  eskolako haurren guraso taldearen alde egin zuen. Zorionak!!!!!

Aizarnako Amabirjinak  duten ekintza  ezaugarrienetako bat oilasko biltzea  da.  Aurten  ez zegoen iragarrita,  baina zailtasunak   gainditu eta   azken orduetan osatu zen gazte talde bat  ekintza hau burutzeko. Berauek eman zuten ikuskizun polita eguerdian, naiz eta beste urteetako mailara ez iritsi, plazan zegoen  ekintza batek oztopatzen baitzuen  amaierako ekitaldia. 

Aipatu gabe ezin utzi  Patxi Urbietak Kultur Etxean jarri zuen miniaturazko baserri eta itsasontzien  erakusketa. Artisau lan bikaina eta ordu askoren bitartez lortutako emaitza zegoen bertan.   Iunabarrean herriko jendearentzat K.0 deitutako  ikuskizuna zegoen.  Musika, dantza, kantu eta bertsoekin osatu zuten berau. Iritzi bat eman behar eta esango nuke ekintza honetan  argi gutxi zegoela  guztiz disfrutatzeko.

Amabirjina egunean amaitu ziren jaiak ikuskizun zoragarri batekin. Iragarrita zegoenez, egun   Euskal Herrian pentatloiak dituen kirolari onenak hartuko zuten parte lehiaketan. Korrika, aizkoran, harri jasotzen, txingak eta giza proban, ikuskizun paregabea eman zuten herriko plazan. Hauekin batera “xerpa” gazteak ere 100 kiloko harria jaso zuen sei aldiz.  Txalo zaparrada ederra jaso zuen, Aizarnan oso ezaguna baita mutil hau. 

Baita ere aipatu egin behar Jagoba Otaegi Aizarnarrak, 150 kiloko harri zilindriko zaharrarekin egin zuen saiakera. Eta ondo gainditu zuen berau, erraz jaso baitzuen  bizkarrera harri moldakaitz hau . Gero  pentatloian  hartu behar zuen parte eta  aurretik hau egiteak   balio erantsi handia eman zion saiakera honi.

Herri Kirolekin jarraitu eta Jagoba Otaegi Aizarnako gazteak kirolean egin duen bideari egingo diot aipamen berezi bat. Mutil hau txikia zela aitarekin batera ezagutu nuen Aizarnako plazan harri jasotzen, geroztik urtero ikusi dugu harrien mailak gorakada eginez   lan egiten. Egun kirolari onenekin ikusten dugu lehian, Aizarnan ere hala ikusi dugu, eta honek  egin duen aurrerapena kirolean txalotzekoa da benetan. Ez da  amaitu bere bidea kirolean eta batek daki zer ikusteko gauden. Bejondeiola!!!!

Honelako kirolari batek,  beti ematen dio herriari balio erantsi bat  eta hau ikusi ondoren,  German Zelaia bertso zaleak hiru bertso osatu dizkio berari.  Hemen argitaratzen ditut behean, merezitakoak ditu eta.

Amaitzen joateko  esan beharra daukat Udal Langileen greba dela eta zalantzak zituela jendeak garbitasun aldetik  arazorik izango ote zen edo, baina ez, egunero  egin dira garbiketak. Herria garbi eta txukun ikusi dugu eta herrian  birziklatzeko dagoen kontzientziak ere lagundu zuen horretan. 

Idatzi honek  jaien zati bat  islatzen du eta  osoan jabetzen laguntzeko behean argitaratzen ditut jaso ditudan argazki eta bideoak. Ea lagungarri izaten diren egun hauetako giroaz jabetzeko.

German Zelaiak osatutako  hiru  bertso Jagobari eskainiak 

Lehen ere Aizarnak emanak ditu

kirolari on bikainak,

harri, korrika, pilota, aizkora

marka galantak eginak,

baina gaur egun mugitzen gaitu

Jagobaren eraginak,

alde batera uzten badaki

perezak eta ezinak.

Behin epaileak emandakoan

lanerako agindua,

kargaren beldur denbora luze

etzinen ez egondua,

hamabi arroako koadro zahar

eman ziñun astindua,

idatzi beharrik ez dago hori

lekuko dago mundua.

Jaio, hazi ta jarraitzen duzu

hor Ergoingo bailaran,

markarik marka aurrera zoaz

bat bestearen ilaran,

beti hor goian egote hori

badakigu zer zaila dan,

egindakoa gozatuz jarrai

luze holako boladan.

Jon Egiguren