Albisteak

Zestoako Udalak 7,5 milioi euroko aurrekontua onartu du 2025erako, zuhurtzia ekonomikoak baldintzatuta

— 2024-12-23

ARGAZKIA: Zestoako Udala

Zestoako Udalak, abenduaren 19ko, ezohiko udalbatzarrean, 2025erako udal aurrekontuak onartu zituen, 7.563.016 eurokoak. EH Bilduren aldeko botoak (7) eta EAJren kontrakoak (3) izan ziren, eta “ez kritikoaren” alde egin zuten.

Mikel Arregi alkateak nabarmendu zuen aurrekontua zuhurtzia ekonomikoak markatzen duela, Auzitegi Gorenaren epaiaren ondorioz; izan ere, Udalak 523.000 euroko kalte-ordaina eman behar dio herritar bati. Egoera horri aurre egiteko, Udalak mailegu bat eskatu du, hurrengo ekitaldiko inbertsio-ahalmena mugatuz.

Inbertsio nagusiak honako hauek dira:

• GI-631 errepideko obrak: 893.979 euro, aurrekontuko partidarik handiena.
• Arroabeko igogailua: 523.000 euroko aurrekontuarekin, Eusko Jaurlaritzak % 60an finantzatuta.
• Kale Okerreko etxebizitzak eraistea: 150.000 euroko aurrekontuarekin, 22 etxebizitza publiko eraiki aurretik.
• Ertxinen baso-landaketa: Gipuzkoako Foru Aldundiaren ia % 100eko dirulaguntza.

EAJko bozeramaile Garikoitz Mendizabalek aurrekontuak kritikatu zituen 2024an udal gobernuak esandakoak bete ez zituelako. Arregik, bere aldetik, bete ez diren konpromisoengatik egindako kritikak onartuz erantzun zuen, baina erabakiak “duinak” eta egungo baldintza ekonomikoekin bat datozenak direla defendatu zuen.

Udalbatzarra osorik ikusteko, hemen: Abenduaren 19ko Ezohiko Udalbatzarraren bideoa

Irakurle, gure webgunean albiste hau irakurri baduzu, publizitate eta erakundeen diru laguntzez gain, urtero 30 euroko diru ekarpena egiten duten 350 bazkidetik gora ditugulako izan da. Mila esker bazkide! Herri eta auzoetako berri euskaraz emanez, normalizaziora bidean gure ekarpena egiten jarraitu nahi dugu. Proiektua sendotzen lagundu nahi baduzu, egin zaitez bazkide.

Egin zaitez bazkide