Albisteak

Eguna hotza izan bada ere, abenduko giro zoragarria nagusitu da gaur  Zestoako Zoroperi egunean. Iriakaitz txistularien dianak eman dio hasiera azoka erdigune duen festa egunari, eta goizetik bertatik giro bizia sortu da herriko kaleetan.

Barazki eta fruta postuak, gazta eta eztia, eta ehungintzako zein bestelako artisauen lanak izan dira ikusgai, herritar ugari erakarriz eta azokari ohiko kolorea emanez. Itxaropena dantza taldeak eta herriko trikitilari eta panderojoleek musika jarri eta herritarrak dantzan jarri dituzte.

Ezti, sagardo eta barazki eta fruta lehiaketak amaituta, sagardo dastaketak eman dio amaiera goizeko egitarauari. Festak, hala ere, ez du etenik izango, eta arratsaldean ere jarraipena izango du Zoroperi eguneko ospakizunak.

Arratsaldeko egitaraua: 

• 17:15. Denok kiroldegira kalejira txarangarekin.
• Ondoren, herri kirol eta pilota jaialdiak, Abantzu pilota elkarteak antolatuta, kiroldegian. Ekitaldian, Naroa Agirreri eta Jon Alberdiri esker ona adieraziko diete. Harri jasotzea, zaku eramatea eta lokotx biltzea, Abantzu eta Zestoa taldeen artean. Gero, Udane eta Elene Ostolaza harri jasotzen. Pilota partida: Txapei-Aizpuru eta Sasiain-Elizegi.
• 18:00. Magiklown magia eta pailazo ikuskizuna, Kultur Etxean.
• 19:15. Bertso poteoa Amets Arzallus eta Aitor Salegi bertsolariekin, Erniarraitz elkarteak antolatuta.
• 19:30 eta 22:30. Obaneuke erromeria taldea.