Albisteak

Euriak ez zuen galarazi atzo, azaroaren 25ean, Emakumeen Aurkako Indarkeriaren Nazioarteko Egunean, herritarrak kalera ateratzea. Zestoan bi deialdi izan ziren. Lehenengoa Zestoako Mugimendu Feministak antolatu zuen, eta 18:30ean abiatu zen plazatik. Manifestazioak herria zeharkatu zuen kiroldegiko aterperaino, jende ugariren parte-hartzearekin. Bi pankartaren artean egin zuten ibilbidea: aurrean “Zuen hipokresia indarkeria da” zioena, eta atzekoak, berriz, “Elkartasuna ez da delitua, zuekin gaude”. Ekitaldiaren amaieran, antolatzaileek hitzartzea egin zuten.

Jarraian, 19:00etan, Itaiak bere kontzentrazioa egin zuen herriko plazan. Haien pankartan “Indarkeria matxistaren aurka borrokatu” irakur zitekeen, eta kontzentrazioan zehar oihu eta txalo artean egin zituzten aldarrikapenak. Hitzartearen ostean, tortilla gorriz tintatu eta bigarren pankarta bat eskegi zuten, zeinak honela zioen: “Erasotzaileen inpunitateari aurre egin!”. Ekitaldi honen amaieran ere taldeko kideek hitzartzea eskaini zuten.