Albisteak

Goizetik hasita ez dute aspertzeko tarterik izan haurrek festen hirugarren egun honetan. Izan ere, gaur Umeen Eguna ospatzen ari dira, eta ekintzaz jositako eguna dute aurretik etxeko txikienek. Egun honetan ohikoa den moduan, zuri-gorriz jantzita atera dira kalera.

Diana zaratatsuarekin hasi dute eguna, festa giroa kalerik kale zabalduz. Kazuela, danbor eta turuten hotsak izan dira protagonista eguneko lehen hitzorduan. 12:00etan, kanpaiek jo orduko, txupinazoa bota dute udaletxeko balkoitik, protagonistak ilusioz gainezka zirela. Ondoren, gaztetxoen dantzaurrea eta zahagi-dantza egin dituzte Itxaropena dantza taldekoek, Idiakaitz txistulari taldeak doinua jartzen zuen bitartean.

Hori gutxi ez, eta bazkalaurretik Lopene ganadutegiko poniak eta zezentxoak izan dira protagonista plazan. Zezen plaza jendez bete da, eta haurrek gogotik gozatu dute. Goizeko ekintza sortaren ostean, 14:30ean, haur, gaztetxo eta gurasoentzako bazkaria izango da kiroldegiko aterpean.

Hona hemen arratsaldeko egitaraua:

14:30. Ume, gaztetxo eta gurasoentzat bazkaria, kiroldegiko aterpean.
15:30. Karaokea, kiroldegiko aterpean.
18:00. Umeentzat tailerrak, frontoi zaharrean.
19:00. Aliritzi erromeria, kiroldegiko aterpean.
22:00. Suzko zezena, plazan.
Ondoren, Sedientos de Cumbia eta Txamakos taldeekin dantzaldia.
Herritarrak txuri gorriz janztera gonbidatu ditu udalak.