Albisteak

Zestoako Futbol Taldeko gizonezkoen gorengo mailako taldeak etxean jokatu zuen 25. jardunaldiko partida joan den larunbatean. Aurrean Zumaiako Futbol Taldea izan zuen, sailkapenean puntu bateko abantailarekin postu bat gorago dagoena. Lehia orekatua izan zen, eta azkenean, 1-1eko berdinketarekin amaitu zen norgehiagoka. Zestoarren gola Xuban Salegi aurrelari azpeitiarrak sartu zuen lehen zatiko 30. minutuan.

Berdinketa honen ostean, herriko taldea 11. postuan kokatzen da, 29 punturekin. Denboraldi amaierarako bost partida geratzen dira: hiru etxean jokatuko dituzte eta bi kanpoan. Hurrengo partida apirilaren 6an izango da, igandez, 17:30ean, Azpeitiko Garmendipe futbol zelaian, Ikasberri taldearen aurka. Partida hauetan gorengo mailan mantentzeko helburuari eusten saiatuko da Kepa Larrañagaren taldea.

Asteburuko gainontzeko emaitzak:

– Gizonezko jubenilen gorengo maila: 3-1 galdu zuten Mutrikuren aurka. Sailkapeneko laugarren postuan jarraitzen dute, 46 punturekin.
– Gizonezko kadeteen gorengo maila: 4-2 galdu zuten Zarautz Kirol Elkartearen kontra. 10. postuan daude, 35 punturekin.
– Gizonezko kadeteen 1.mailako udaberriko kopa: 1-3 nagusitu ziren Eibartarrak taldearen aurka. Horrela, 7. postuan daude, 15 punturekin.
– Emakumezko kadeteen 1.mailako kopa: 0-1 galdu zuten Arizmendi-Uda taldearen aurka. Sailkapeneko 6. postuan daude, 14 punturekin.
– Infantil mutilen 1.mailako txapeldunen fasea: atsedena izan dute asteburu honetan. Sailkapenean 8. postuan daude, 12 punturekin.