Albisteak

Gaur, Emakumeen Nazioarteko Egunean, herriko kaleak morez jantzi dituzte guztien artean. Eguraldi eguzkitsuarekin, dozenaka eta dozenaka herritar kalera atera dira eguerdian, Zestoako Mugimendu Feministak deitutako manifestaziora.

Beste mundu bat feminismotik. Zapalkuntza sistemen aurrean, antolakuntza eta borroka zioen pankartaren atzean, herriko kaleetan zehar ibili dira aldarri feministak oihukatuz. Bandera, globo eta pegatina moreekin herriari bueltatxoa eman ondoren, haur nahiz heldu herriko plazan bildu dira.

Bertan, talde feministako kideek hitzartzea egin dute, eta txalo zaparradarekin borobildu dute manifestazioa.