Albisteak

Gipuzkoako Euskal Pilota Federazioak antolatuta, benjamin eta alebin kategorietako neska pilotariek topaketak ospatuko dituzte igandean Zestoan. Eskuzko modalitatean jokatzen duten 30 pilotari baino gehiago elkartuko dira kiroldegiko frontoian: benjamin kategoriako hamabi eta alebin kategoriako hogei. 10:00etan hasiko dira topaketak, eta alebinen txanda izango da lehenengo; benjaminen txanda, berriz, 11:30etik 13:00etara izango da.

Egindako beste saioetan bezala, besteak beste, jolasak, dinamikak eta partidatxoak egingo dituzte neskek, guztiak elkarrekin. Antolatzaileek jakinarazi dutenez, parte-hartzaileek ez dute zuriz jantzita joan beharrik izango. Parte hartuko duten pilotariak ondorengo klubetakoak dira: Abantzu (Zestoa), Adospilota, Alkiza, Aloña Mendi (Oñati), Behar Zana (Amasa-Villabona), Bergara, Hondarribia, Ilunpe (Azpeitia), Lapke (Lazkao), Oiarpe (Oiartzun), Oteiza (Azkoitia), Otsabio (Lizartza), Pagazpe (Usurbil), Urnieta, Zarautz eta Ziotza (Zizurkil).