Albisteak

Arratsaldeko zazpietarako zeukan deitua Kontseilu Sozialistak elkarretaratzea. Dozenaka lagun elkartu ziren plazan “Israel estatu terrorista. Palestina askatu!” lemapean. Kontzentrazio amaieran ondorengo testua irakurri zuten:

Israel estatu terrorista! Palestina askatu!

Azken hilabeteetako erasoaldirik bortitzena egin du Israelek aste honetan. Astearte goizaldean 400 palestinar baino gehiago erail zituen estatu sionistak Gazan, ospitaleen, etxebizitzen, eta kanpalekuen aurka egindako bonbardaketan. Horren ondotik, militarrek Gaza iparraldea eta hegoaldea lotzen dituen korridore nagusia okupatu dute, eta gobernu sionistak beste ofentsiba bat iragarri du. Israelek urtarrilean palestinar erresistentziarekin sinatu zuen su-etena behin eta berriro urratu duen arren -besteak beste, dozenaka palestinar erailda, ur eta argi hornidurak moztuta edota laguntza humanitarioa blokeatuta- Ramadan hilabetean egindako azken eraso honek berriz ere agerian utzi du Israelen izaera terrorista. Estatu supremazista honek ez du akordiorik nahi, eta palestinar herriaren aurkako genozidioarekin aurrera jarraitzeko asmoa du.

Horrez gain, Israelek Ekialde Hurbileko beste herrialde batzuen kontrako erasoak areagotu ditu azken hilabeteetan, besteak beste, Siria hegoaldea inbadituz edota Yemen, Libano eta Iran bonbardatuz. Ofentsiba honek, Netanyahuren gobernuaren belizismoari ez ezik, Estatu Batuak buru duen mendebaldeko bloke inperialistaren interesei erantzuten die. Izan ere, Estatu Batuen funtsezko aliatua da Israel, eskualde osoan zehar baliabideak harpilatzen eta merkataritza-ibilbideak kontrolatzen jarraitzeko. Palestinarren garbiketa etnikoaren alde ere bi bazkideak bat datoz, Trumpek duela aste batzuk Gazan hotelak eraikitzeko iragarritako planarekin ikusi genuen bezala.

Europar Batasuna erabat lerratuta dago oligarkia atlantistaren interesekin, eta beraz, baita estatu sionistarekin ere. Herrialde batzuek Israelen defentsarako eskubidearen izenean genozidio hau justifikatzen duten bitartean, beste batzuek, Espainiako Gobernuak kasu, Palestinaren aldeko mezu hipokritak zabaltzen dituzte sarraskia gelditzeko inolako neurri efektiborik hartu gabe. Herrialde batzuk zein besteak Israelekin harreman diplomatiko, ekonomiko eta militarrak izaten jarraitzen dute; eta guztiek ahalbidetzen dute palestinarren aurkako genozidioa. Europako industria militarra indartzeaz horrenbeste hitz egiten den garaiotan, gogoratu behar dugu Europar Batasuna dela arma esportatzaile nagusietako bat Israelentzat.

Israelek bere kolonizazio planarekin jarraitzeko asmoa du, eta hilabete hauetan batzuek hain ozen aldarrikatzen duten “Nazioarteko Zuzenbideak” ere argi erakutsi du ez duela sarraskia geldituko. Horrekin batera, sozialdemokraziak defendatzen duen bi estatuen irtenbidea ere, Israelen izaera kolonialagatik ezinezkoa izateaz gain, gatazkaren erroa estali eta estatu sionistaren existentzia zilegiztatzen du. Bestalde, gaur egun su-etena soluzio gisa aldarrikatzea, Israelek behin eta berriro frogatu duenean ez duela inolako akordiorik errespetatuko, ez da irtenbide bat.

Israelek existitzen jarraitzen duen bitartean, sarraskia eta heriotza hedatzen jarraituko du Ekialde Hurbilean. Palestinaren askatasuna estatu sionistaren desagerpenaren eskutik baino ezingo da etorri. Norabide horretan aurrera egiteko, hainbat eginkizun aldarrikatzen ditugu. Batetik, palestinarren erresistentzia eskubidea babestea inolako ekidistantziarik gabe. Bestetik, mendebaldeko enpresen, instituzioen eta alderdi politikoen konplizitareari aurre egitea Israelekin harremanak eten ditzaten. Azkenik, nazioartean kapitalismoari eta gertate inperialistei aurka egingo dien langileon indar iraultzaile bat antolatzen hastea.

Basakeria sionista ez da bere kabuz geldituko, eta guk ere ezin dugu geldirik egon. Palestinarren erresistentzia mundu osoko langileontzat eredugarri izaten ari den honetan, jarrai dezagun guk ere kaleak hartzen Palestinaren alde eta gerra inperialistaren aurka.