Albisteak

Gaztetxearen urteurrena ospatuko dute hilaren 24an

— 2024-02-15

2023ko otsailean Zestoako Kultur Etxetik zentrora pasa zuten Zestoako Gaztetxea, urtebetean hainbat ekintza burutu dituzte bertan, tira birak ere izan dira. Momentuan Elizondo eraikina uzteko agindua badago ere, urteurrena iritsi da eta otsailaren 24an, festa giroan, egun osorako egitaraua antolatu du Gazte Asanbladak.

12:30ean bertso poteoarekin hasiko dute ospakizuna, Jon Gurrutxaga eta Gorka Pagonabarraga bertsolariekin. Ondoren, 15:00etan bazkaltzeko elkartuko dira Elizondo eraikinean.

Indarrak hartu eta gero, festak jarraituko du, 17:00etatik aurrera herri kirolak ikusi ahalko dira: Jon Lapeira, Lierni Osa eta Maddi Gesalaga lehiatuko dira frontoian. Jarraian, pilota partidak jokatuko dira, Mattin Eizagirre eta Liam Zunzunegi, Ioritz Arantzeta eta Mikel Armendarizen aurka.

Iluntzean 22:00etatik aurrera musika izango da jaialdiaren protagonista: Istilu, Tiratxinas, Berandu baino lehen, Yakovlev 42 eta DJ HGS taldeek jarriko dute giroa.

Irakurle, gure webgunean albiste hau irakurri baduzu, publizitate eta erakundeen diru laguntzez gain, urtero 30 euroko diru ekarpena egiten duten 350 bazkidetik gora ditugulako izan da. Mila esker bazkide! Herri eta auzoetako berri euskaraz emanez, normalizaziora bidean gure ekarpena egiten jarraitu nahi dugu. Proiektua sendotzen lagundu nahi baduzu, egin zaitez bazkide.

Egin zaitez bazkide