Albisteak

“Irunberri 1990: Arroilaren negarra” liburua aurkeztuko du Pako Aristik gaur arratsaldean Kultur Etxean

— 2023-05-17

Portale kultur elkarteak antolatuta, “Irunberri 1990: Arroilaren negarra” liburua aurkeztuko du Pako Aristik gaur, arratsaldeko 19:00etan, Kultur Etxean. Aristirekin eta Gure Bazterrak elkarteko kideekin solasaldia izango da ondoren.

1990eko ekainaren 25era darama irakurlea Pako Aristik. Irunberriko arroilara, hain justu. ETAko hiru kide izan ziren protagonista egun hartan, bi guardia zibilekin batera. Emaitza: ETAko bi kide hilda, bat larri zaurituta, eta guardia zibil bat hilda eta bestea zaurituta. Jose Luis Corcuera orduko Espainiako Gobernuko Barne ministroaren bertsioa izan da orain arte bertsio ofiziala. Alegia, guardia zibila inguruetan lapurreta batzuen egileen bila zebilela ETAko kideekin topo egin eta identifikatzeko eskatu zietenean tiroketa bat egon zela, guardia zibiletako bat larri zauritu zutela ikusita ospitalera eraman zutela eta bitartean ETAko hiru kideek beren buruaz beste egin zutela. Liburuan, ordea, egindako ikerketa lanek ondorioztatzen dute bertsio ofiziala ez dela zuzena eta ETAko kideak galdekatu eta torturatu ondoren hil zituztela. Tartean egun horretan arroilan zeuden turista holandar baten eta Gasteizko hainbat haurren testigantza berriak jaso dituzte eta garaiko protagonistak elkarrizketatu dituzte pista garrantzitsuak bilduz.

Pako Aristik lan hau guztia Oñatiko Gure Bazterrak taldearekin elkarlanean egin du eta maiatzaren 17an, asteazkena, Zestoako kultur etxean egingo den liburu-aurkezpenean izango dira elkarteko bi kide ere.

Irakurle, gure webgunean albiste hau irakurri baduzu, publizitate eta erakundeen diru laguntzez gain, urtero 30 euroko diru ekarpena egiten duten 350 bazkidetik gora ditugulako izan da. Mila esker bazkide! Herri eta auzoetako berri euskaraz emanez, normalizaziora bidean gure ekarpena egiten jarraitu nahi dugu. Proiektua sendotzen lagundu nahi baduzu, egin zaitez bazkide.

Egin zaitez bazkide