Albisteak

Urola Erdiko Mankomunitateak kafe kapsulak biltzeko edukiontzi berezia jarri du Gurutzeaga kalean. Gainerako zabor edukiontzien ondoan kokatu dute. Edukiontzi honetan kafe kapsulak bakarrik bota ahal izango dira, modu egokian birziklatu ahal izateko. Horrela, materiala banandu egingo da: alde batetik kapsula eta bestetik kafe hondarra. Materialak prozesatu ondoren, kapsularen plastikoz eta aluminioz osatutako material berria lortzen da; kafe hondarretatik, berriz, substratua sortzen da.

Urola Erdiko Mankomunitateak azaldu duenez, gaur egun kafe kapsulen erabilera oso ohikoa da gure egunerokotasunean, baina sortzen duten hondakina kudeatzea zaila da. Nahiz eta kapsulak plastikozkoak eta aluminiozkoak izan, kafe hondarrak dituztenez, ontzi arinen edukiontzian ezin direla bota ohartarazi dute, horrek birziklatze prozesua oztopatzen baitu.