Albisteak

Poeta zestoarrak, Lluïsa Etxeberriak, bere hirugarren poema-liburua aurkeztuko du urriaren 25ean, larunbata, 12:30ean, Zestoako Kultur Etxean. Aurkezpena berezia izango da, poesiaz gain, musika, ilustrazioak eta dantza uztartuko dituena.

Egilearekin batera oholtza gainean arituko dira: Nerea Mendizabal eta Agurtzane Auzmendi abeslariak, Garikoitz Mendizabal txistularia, Aitor Furundarena soinu-jotzailea, Fermin Etxeberria perkusio-jotzailea eta Ane Mendizabal dantzaria.

Aurten argitaratutako liburu berria, “Hitzen aterpean”, barne-borrokak, zauriak eta bizitzako galerak bildu eta berreraikitzeko gonbita egiten duen obra da. Poemarioa hiru zatitan banatuta dago:

· “Errauts irazekia”: hondakinetatik gordetzeko eta berreraikitzeko balio duena bilatzen du.
· “Begirada sareztatuak”: lagun egiten diguten hitzen indarrarekin bizitza eraberritzera gonbidatzen gaitu.
· “Errautsetik birsortzea”: abiatze berri baterako bideaz mintzo da, itxaropentsu.

Lluïsa Bartzelonan bizi bada ere, bere jaioterrira itzuliko da oraingoan, publikoari aurkezpen hurbil eta poetikoa eskaintzera.