Albisteak

Emaitza bikainak lortzen ari da Euskal Selekzioa Argentinako Mendozan jokatzen ari den XI. Munduko Esku Pilota Txapelketan. Lehen jardunaldietan gizonezkoen zein emakumezkoen mailetan jokatutako 14 partidak irabazi ditu taldeak, eta garaipen bolada horretan parte hartu du Naroa Agirre herritarrak ere.

Arroagoiko pilotariak hiru partida jokatu ditu txapelketan, eta bere modalitatean, One Wall delakoan, zuzenean finalerako sailkatu da Euskal Selekzioa, ligaxkako zazpi neurketak irabazita. Ingalaterra, Italia, Txile, Argentina, Venezuela, Herbehereak eta Valentziaren aurka nagusitu dira euskal pilotariak, hasieratik maila handia erakutsiz.

One Walleko finalak ostiralean, apirilak 10, jokatuko dira. Euskal Selekzioa Puerto Ricoren aurka ariko da Argentinako 11:15ean, eta arratsaldean erabakiko dira podiumeko postuak: 3. eta 4. postuak 16:00etan, eta final handia 18:00etan.

Txapelketa apirilaren 6an hasi zen inaugurazio ekitaldiarekin, eta hainbat modalitate biltzen dituen hitzordua igandera bitartean jokatuko da Mendozan.