Bailarako hainbat herrietako kideek osatzen dugun Azpeitiko Sokaitz eskalada elkarteak, inguruko mendietan egin asmo diren haize erroten proiektuen inguruan bilera deialdia luzatu zuen bere bazkideen artean. Batzarraren ostean eta gai honen inguruan eztabaidatu ondoren, gaur egun bizi dugun larrialdi klimatikoaren jakitun izanik, eta energia berriztagarrien alde egon arren, errota hauen kokapena mendi gainetan saihestu beharra ikusten dugu. Izan ere, berauek baitira gaur egun gutxien eraldaturiko natur-gune bakarrenetarikoak eta duten balioa lehenetsi nahiko genuke guretzat zein ondorengoentzat. Horrela Azpeitiko, Azkoitiko eta Zestoako mendi taldeek aurkeztu zuten idatzia oinarritzat hartu eta bertara atxikitzen garela adierazten dugu.