Albisteak

Atzo aurkeztu zen Donostian Pako Aristik idatzitako “Uztapide eta Xalbador. Bi adiskide mugaz gaindi” liburua. Zestoa eta Urepele senidetze egitasmoa bi bertsolari handien laguntasunetik abiatu da eta proiektu horren baitan Sortu da liburu hau. Pako Aristi, idazlea, Urepeleko alkatea, Xole Aire eta Mikel Arregi, Zestoako alkatea izan ziren liburua eta senidetze proiektua aurkezten Inacio Mujica Erein argitaletzeko ordezkariarekin batera.

Manuel Olaizola “Uztapide” eta Fernando Aire Etxart “Xalbador” euskal kulturaren figura garrantzitsuak izan ziren, eta euren adiskidetasun eta lankidetza historia Pako Aristiren . Uztapide, 1909an Zestoan jaioa, eta Xalbador, 1920an Urepelen jaioa, bertsolariek, nahiz eta desberdinak izan eta euskalki desberdinak erabili, hiru hamarkadako adiskidetasuna mantendu zuten, elkarren miresmenean oinarritua. Hari horri jarraika Zestoa eta Urepele senidetze egitasmoa jarri dute martxan bi herrietako alkateek. Proiektu honek bertsolari hauen oroimena bizirik mantentzea ez ezik, bi komunitateen arteko lokarri kulturalak sendotzea ere bilatzen du.

Aurkezpenean Pako Aristik luze eta zabal hitz egin zuen liburua idazterakoan aurkitutakoaz:

Liburua eta bere testuingurua: Pako Aristik, bere liburuan, bi bertsolari hauen ondarea denboran zehar nola aldatu den aztertzen du. Aristiren arabera, Uztapideren lana bere garaiko errealitatean ainguratuta geratu zen, eta garrantzia galdu zuen Franco hil ondorengo testuinguru-aldaketarekin. Xalbadorrek, ordea, bizirik dirau imajinario kolektiboan, bere poesiaren denboraz kanpoko izaera dela eta.

Partekatutako uneak Uztapide eta Xalbadorren arteko adiskidetasunak ere une latzak izan zituen, hala nola Xalbadorrek final batean jasan zuen txistu zaparradak eta Uztapide eszenatokian ahotsik gabe utzi zuen bihotzekoa. Pasarte horiek, Xabier Amuriza hitzaurregileak kontatzen ditu eta gizatasuna eta elkarren arteko harremanaren islatzen dute.

Biak bertsolariak, biak ezberdinak: Uztapide bere garaiko kronista izan zen, bere bertsoetan errealitate garaikidea harrapatzeko duen gaitasunagatik ezaguna. Haren estiloa zuzena eta lurtarra zen, eta publikoarekin bat egiten zuen, kantari ari zela begietara begiratzen baitzien. Hiru txapel irabazi zituen bere ibilbidean zehar, eta bere garaiko bertsolaririk nabarmenena izan zen. Xalbador, aldiz, bere estilo abstraktu eta poetikoenagatik nabarmendu zen. Inoiz txapelik irabazi ez bazuen ere, bere eragina askoz luzeagoa izan da, euskal talde eta abeslari ugarik musikatu baitituzte bere bertsoak. Begiak itxita kantatzen zuen, bere ikuspegi introspektibo eta ameslaria sinbolizatzen zuena.

Liburuaren aurkezpena eta mahai-ingurua Zestoan, ekainaren 19an

Liburuaren inguruan gehiago jakin nahi duenarentzat, ekainaren 19an, arratsaldeko 19:00etan izango da aukera Kultur Etxean. Pako Aristi eta Xabier Amuriza izango dira bertan eta Jon Artanok gidatuko du saioa.