Albisteak

Zestoa Futbol Taldeak klubaren eguna antolatu du lehen aldiz larunbaterako, maiatzaren 31rako. Denboraldia amaituta, urte guztian zehar egindako lana ospatu nahi dute egun berezi honen bidez.

Iraetako futbol zelaian izango da egun osoko egitarau zabala eta goizeko 11:00etan emango zaio hasiera haur eta gaztetxoentzako ekintzekin. 12:20ak arte, puzgarriak, giza futbolina, giza bilarra, puntuazio-porteria eta bestelako jolasak izango dira. Ondoren, 12:30ean, denboraldiko emaitzen berri emateaz gain, klubaren baitan lanean aritu diren guztiei aitortza egiteko ekitalditxoa egingo da.

Jarraian, puzgarriak eta jolasak 13:00etatik 19:00etara bitartean egongo dira martxan. Egun osoan zehar musika, janaria eta edaria egongo dira eskuragarri.

Klubeko zuzendaritzak herritar guztiak animatu ditu festan parte hartzera, azpimarratuz “egun hau denen artean ospatzekoa” dela eta helburua “klubaren eguna urtero errepikatuko den ohitura bilakatzea” dela.