Albisteak

Santio-santana festen ospakizun betean murgilduta daude Arroagoiko auzotarrak. Atzo, ostiralez, bigarren festa eguna ospatu zuten, eta goizetik hasita, askotariko ekintzekin gozatu zuten Santio egunez.

Goizean patata tortilla eta sagardo lehiaketak nahiz pilota partidak izan ziren protagonista. Arratsaldean, berriz, 18:30ean hasita, herri kirolen ikuskizuna izan zen ekitaldi nagusia. Jendez bete zen plaza Biurri eta Joxan Etxeberria aizkoran, eta Elene eta Udane Ostolaza harri jasotzen ikusteko. Ikuskizunak irauten zuen bitartean eta ondoren, trikitilariek giroa alaitu zuten, eta bertaratutakoek festaz gozatzen jarraitu zuten txosna inguruan.
22:30ean, ohiko argazki proiekzioa egin zuten, eta ondoren Izer eta Alabier trikitilariek gauari jarraipena eman zioten. Santio eguna amaitzeko, DJ Indateren saioa izan zen.

Gaur eta bihar ere festa giroa nagusi izango da. Hona hemen bi egunetako egitaraua:

Gaur, larunbata. Santa Ana eguna

11:00. Meza nagusia.
Ondoren, hamaiketakoa eta bingoa jubilatuentzat Akulu bertsolariak alaiturik.
17:30. Bakarrizketak, Mirari Martiarena eta Ander Malbadiren eskutik.
19:00. Herritarren arteko kirolak.
23:00. Erromeria Bide Batez Taldearekin.
2:00. DJ Indate.

Uztailak 27, igandea

11:00. Tolareko igoera.
12:00. Altxorraren bila.
14:00. Ume bazkaria.
16:30. Ume jolasak.
17:30. Apar festa.
Jarraian, txokolatada.
23:00. Iruzta taldearekin dantzaldia (tartean otarraren zozketa eta argazki lehiaketako irabazlea).