Albisteak

Ondarearen Europako Jardunaldiak ari dira ospatzen hil honetan Gipuzkoako hainbat herritan, eta atzo Zestoaren txanda izan zen. “Ekain kobazuloaren berrikustea: XXI. mendeko arkeologiaren ikuspegi berria” izenburupean, Diego Garate arkeologoak eta Kantabriako Unibertsitateko arte parietal paleolitikoan doktoreak eskaini zuen hitzaldia.

Unescok Gizateriaren Ondare izendatutako Ekain kobazuloari begirada berri bat eman dio arkeologo talde batek, azken urteetako ikerketa arkeologikoen sistemetan eta metodoetan egindako aurrerapenei esker. Horri esker, kobazuloari buruzko informazio berria eta osatuagoa jaso dute, eta hori ezagutzeko aukera izan zuten atzo udaletxeko pleno aretora bertaratutakoek.

Bisita gidatua Ekainberrin

Bestalde, bihar, hilaren 11n, “Nola egin zen Ekainberri erreplika?” izeneko bisita gidatua eskainiko dute Ekainberrin. Euskarazko bi saio izango dira: lehena 11:30ean, eta bigarrena 16:30ean.

Ekaingo jatorrizko kobazuloa 1969an haren labar artelanak aurkitu zirenetik dago itxita publikoarentzat, ondarea babesteko helburuarekin. Publikoari artelan horiek erakusteko asmoz, Ekainberri eraiki zen gero, eta biharko bisitan museoaren sorrera azalduko dute.

Bisita helduei zein haurrei zuzenduta egongo da. Izen-ematea doakoa da, baina plaza mugatuak direnez, interesa dutenek 943 86 88 11 telefono zenbakira deitu edo info@ekainberri.com helbidera idatzi beharko dute.