Albisteak

Korrika Urola bailarara iristear dela, AEK-k aurreratu du zein puntutan hartuko duten lekukoa herriko eragileek, bai Arroa Behean eta bai Zestoan. Antolakuntzak emandako informazioari esker, dagoeneko zehaztuta daude ibilbideko geldialdi nagusiak eta parte hartuko duten taldeak.

Korrika lehenik Arroa Behetik igaroko da, martxoaren 25ean. Arratsaldeko azken orduan egingo du bidea, eta bi lekuko-hartze izango dira: Narrondon hasiko da, Bakun Itzulpenak eta Ezkaizto eragileen eskutik, eta handik gutxira, Karmengo Amaren errepidean hartuko dute lekukoa Arroa Beheko Festa Batzordeak eta Gipuzkoako Eskola Txikien Gurasoen Koordinakundeak.

Handik hiru egunera, martxoaren 28an, Zestoara iritsiko da Korrika, eta arratsalde osoan zehar luzatuko da ibilbidea herrian barrena. Lasaoko autobus geltokitik abiatuta, herriguneko hainbat puntutan egingo ditu geldialdiak, eta eragile ugarik hartuko dute lekukoa: merkatariak, alderdi politikoak, ikastetxeak, udala, kultur eta kirol elkarteak, baita herri mugimendu ezberdinak ere.

Besteak beste, Gurutzean, plazan, herri sarreran eta tren geltoki inguruan egingo dira lekuko-hartzeak, eta ibilbideak herri osoa zeharkatuko du, amaiera Lasa jatetxe inguruan eginez. Guztira, hogeitik gora eragilek parte hartuko dute Zestoan, euskararen aldeko ekimenarekin bat eginez.

Arroabeako lekuko-hartzeak

Zestoako lekuko-hartzeak