Albisteak

Asteburu honetan trafiko eragozpenak izango dira Azpeitia eta Zestoa arteko joan-etorrietan, Ezkuztako zubian egiten ari diren lanen ondorioz. Azpeitiko Udalak jakinarazi duenez, larunbateko 06:00etatik igandeko 22:00etara ibilgailu pribatuentzat erabat itxita egongo dira Ezkuztako zubia eta Magdalenako sarbidea.

Horrek esan nahi du Zestoatik Azpeitira edo alderantziz joan nahi dutenek ezin izango dutela ohiko bidea erabili, eta udalaren gomendioa da Elgoibartik barrena egitea joan-etorria.

Larunbatean izango da eraginik handiena. 06:00etatik 14:00etara, Ezkuztako zubia eta Magdalenako errepidea ibilgailu guztientzat itxita egongo dira, baita autobusentzat eta taxientzat ere. Larrialdi zerbitzuek bakarrik izango dute pasatzeko aukera.

Larunbateko 14:00etatik igandeko 22:00etara, berriz, zubia itxita mantenduko dute, baina garraio publikoak, autobusak eta taxiak, eta larrialdi egoeran daudenek Magdalenako errepidetik barrena izango dute GI-631 errepidera sartzeko edo handik ateratzeko aukera. Auto pribatuentzat, ordea, sarbidea itxita egongo da oraindik ere.

Igandean 22:00etatik aurrera, zubia berriro irekiko dute eta semaforoen bidez txandaka bideratuko da trafikoa, gaur egun bezala. Une horretatik aurrera, gainera, ibilgailu guztiek izango dute berriro Magdalenatik GI-631 errepidera sartzeko aukera.