Albisteak

ELA, LAB, Steilas, ESK, Hiru eta Etxalde sindikatuek greba orokorra deitu dute martxoaren 17rako Hego Euskal Herrian, 1.500 euroko gutxieneko soldata propioa eskatzeko. “Gutxieneko soldata hemen erabaki” lelopean, soldatak hobetzea eta aberastasuna bidezkoago banatzea aldarrikatuko dituzte.

Grebaren harira, Zestoan ere hainbat ekimen antolatu dituzte egun horretarako. Antolatzaileek jakinarazi dutenez, egitaraua honakoa izango da:

· 08:00etan, informazio piketea plazan.
· Ondoren, hamaiketako kolektiboa egingo dute (norberak berea eramanda).
· 12:30ean, Donostian egingo den manifestaziora joateko deia egin dute.
· 18:30ean, elkarteratzea egingo dute herriko plazan.

Sindikatuen arabera, grebaren helburua da Hego Euskal Herrian gutxieneko soldata propioa ezartzeko bidea irekitzea eta lan baldintza duinak aldarrikatzea. Herritarrak mobilizazioetan parte hartzera animatu dituzte.