Albisteak

Arroabeko plazan ospatuko da artisauen eta baserritarren azoka azaroaren 16an, igandez, Ezkaizto auzo elkarteak eta Txara kooperatibak antolatuta. Goizeko 10:00etatik 14:00etara bitartean, 58 postu jarriko dira, eta bertan izango dute herritarrek elikagaiak ekoizleei zuzenean erosteko, artisau produktuak eskuratzeko eta jan-edateko aukera.

Aurten ere, auzoko eragileek parte hartuko dute azokan. Festa Batzordeak taberna jarriko du, eta Eskola eta Txepetxako haurrek ere euren postua izango dute. Hauek lortutako etekinak Aspanogi elkartearentzat —Gipuzkoako Minbizidun Adingabeen Familien Elkartea— izango dira.

Gainera, taloak dastatzeko aukera izango da. Iaz, aurreko urtekoa baino genero bikoitza prestatu zuten, eta hala ere, dena agortu zen; beraz, herritarren artean taloek arrakasta handia dutela argi dago.

Ekintzaz beteriko azoka izango da. 11:00etan, Jakoba Errekondok bere Ilargia eta landareak 2026 lana aurkeztuko du. Aurkezpenaren ondoren, bertaratutakoek baratzeei, fruitu-arbolei, basoei eta loreei buruzko galderak zuzenean egin ahal izango dizkiote egileari. Goizean zehar, gainera, artile tailerra egingo da, artilea lantzeko prozesua ezagutzeko aukera eskainiz.