Albisteak

Atzo egin genuen Danbolin Azoka, bigarren eskuko azoka, eta oso eskertuta gaude emaitzarekin. Dakizuenez, herritarrei produktuak eskatu genizkien gero guk azokan saldu eta lortutako diruarekin webgune berria egin ahal izateko. Gure helburua 5000 euroko aurrekontuaren erdia inguratzea zen, eta lortu dugu!

Aurreztuta genituen urtea hasi eta gerora saldutako egutegi batzuen diru txamarrak, eta errifa ere jarri genuen eta hortik ateratako irabaziak ere zakuan sartuta, 2500 euroak lortu ditugu!

Ez da lan makala izan, jasoketa, txukunketa, gauzak antolatu, osatu eta prestatu behar izan ditugu, baina herriak nola erantzuten duen ikusita, neke guztiak joan zaizkigu.

Danbolineko taldeak eskertu nahi ditu bereziki gure proiektua bultzatzeko beste behin ere gauzak ekarri dizkiguten herritarrak, goizeko zortzietarako azokaren muntaketa lanetan lagundu zigutenak, azokan txandak egin zituztenak, gauzak erostera, koktelak prestatzera, ikusmirara eta tragoxka bat hartzera gerturatu zineten guzti-guztiok.

Asko izan zarete aurrera begira berriro azokarik antolatuko al dugun galdetu duzuenak, atzo ezetz genion, azken asteetan lan handia eman digu, baina gaur gustura gaude eta emaitza positibo hau ikusita, datorren urtean Danbolinek 25 urte beteko dituen horrekin, … nork daki?

Eskerrik asko!