Albisteak

Badatoz Aizarnako Amabirjin jaiak

Larunbatean eguerdiko 12:00etan, txupinazoarekin batera, emango diete hasiera Aizarnako Amabirjin jaiei eta lau egunez festa giroan murgilduko dira.

Oilasko biltzaileek festei hasiera emateaz arduratuko dira. Larunbatean goizeko 7:30tan hasiko dira etxez etxe dantzan eta 14:30ak aldera egingo dute dantza nagusia plazan. Bitartean, herritarrek paella lehiaketarako prestaketak hasiko dituzte eta 15:00tan herri bazkaria izango da. Egunaren amaieran berriz, Eromeri erromeri taldea, LGHBT erromeri talde punkya eta Kanutto DJa arituko dira gaua girotzen.

Igandean Umeen Eguna ospatuko dute. 11:00tan txupinazo koloretsu batekin hasiera emango diote gaztetxoenek egunari, buru handiekin eta guzti. Jarraian altxorraren bila eta ur jolasak izango dituzte, eta 13:30tan makarroi jana indarrak berreskuratzeko. 15:30tan berriz, Ekain Txou ekitaldiaz gozatzeko aukera izango dute eta ondoren berriz ere jolasera itzuliko dira ginkana-oztopo lasterketan. Jarraian, txokolatada arratsaldea gozatzeko. Gauean Elizagoien Ahizpekin batera erromeriaren erritmoan dantza egiteko aukera izango dute.

Astelehenean berriz, helduen eguna ospatuko dute eta eguna girotzeko hippie-z mozorrotzera animatu nahi dituzte Aizarnarrak. Eguerdiko 12:00tan aspaldiko jolasak berreskuratuz barre pixka bat egingo dute umetako oroitzapenak gogora ekarriz. Arratsaldean berriz, 18:00ak aldera, pilota partiduak jokatuko dira eta 21:00etan herri afaria izango dute plazan. Gauean berriz, 23:00tan hasita, Tximeleta taldea arduratuko da gaua alaitzeaz.

Eta azkenik, asteartean Amabirjin eguna ospatuko da. 11:00tan meza nagusia izango da urtero moduan. Puzgarriak izango dira egun osoan zehar eta 17:00tan gaztetxoenentzat apar festa egongo da. 18:00tan herri kirolak ospatuko dituzte harri jasotzaile eta aizkolariekin eta jaiak umore onez amaitzeko Gozo-Gozo erromeri taldearekin dantza egiteko aukera izango dute gaualdean.

Festa borobilak antolatu dituzte aizarnarrek, beraz badakizue, gerturatu gozatzera.

 




Irakurle, gure webgunean albiste hau irakurri baduzu, publizitate eta erakundeen diru laguntzez gain, urtero 30 euroko diru ekarpena egiten duten 350 bazkidetik gora ditugulako izan da. Mila esker bazkide! Herri eta auzoetako berri euskaraz emanez, normalizaziora bidean gure ekarpena egiten jarraitu nahi dugu. Proiektua sendotzen lagundu nahi baduzu, egin zaitez bazkide.

Egin zaitez bazkide