Paperekoa

Nerabezaroa aldaketa garaia da, eta gazteak euren nortasuna eraikitzen hasten dira, aisialdia antolatzeko modua ere aldatuz. Testuinguru horretan, Zestoako Udalak proiektu berritzailea jarri zuen martxan pasa den irailean, helburu argi batekin: 12 eta 16 urte bitarteko nerabeek herrian duten parte-hartzea eta beraien arteko harremanak sustatzea.

Zestoako nerabeek 12 urterekin bizi duten aldaketa ez da txikia. Lehen Hezkuntza amaitu ostean, Derrigorrezko Bigarren Hezkuntza Azpeitian edo Zumaiako ikastetxeetan jarraitu behar izaten dute. Eskola eta herria aldatzeak lagunarteko ohiturak eta aisialdiaren antolaketa eraldatzen ditu, eta horrek eragin zuzena du gazteen eguneroko bizitzan. Proiektu honen bidez, aldaketa horiei aurre egiteko tresnak eta espazioak eskaintzen zaizkie, laguntza eta orientazioa emanez.

Proiektuaren helburua nerabeen behar eta nahiak ezagutzea eta haien autonomia sustatzea da, komunitatean rol aktiboa izan dezaten. Era berean, gazteen arteko harremanak sendotu nahi dira, herriaren etorkizuna eraikitzen lagunduko duten eragile aktibo bihurtuz, euren ideiak garatzeko baliabide eta espazio egokiak eskura izan ditzaten.

Lehenengo fasea; proiektuaren aurkezpena eta nerabeen ekarpenak

Prozesuak bi fase nagusi ditu; lehen fasea irailetik abendura bitartean burutu zen. Proiektua ikastetxeetan aurkeztu zen, gazte dinamizatzaileei, udal teknikariei eta zinegotziei zein herriko eragileei helaraziz. Urritik aurrera, gazte dinamizatzaileei formakuntza espezifikoa eskaini zitzaien, eta DBHko ikasleekin parte-hartze saioak antolatu ziren Urola, Zumaiena eta Zumaiako herri eskoletan.

Urtarrilaren erdialdean Udalari aurkeztu zitzaion orain arte egindakoa eta lehenengo fasearekin amaitzeko, urtarrilaren 31n lehen bilera egin zen nerabeekin Jubilatuen Tabernan. 60 nerabe inguru bildu ziren, eta bertan Udaleko zinegotziak eta teknikaria, baita prozesuan parte hartu duten herriko hainbat gazte erreferente ere, presente izan ziren. Bilera horretan, nerabeek aurrez egindako zein proposamen garatuko diren azaldu zen eta ekintza horietako batzuk antolatzeko lan-taldeak osatu ziren.

Bigarren fasea; proposamenak garatzea

Prozesua bere bigarren fasean murgilduta dago, eta gazte dinamizatzaileen laguntzarekin, nerabeak euren ekarpenak eta proposamenak garatzen ari dira.

Otsailaren 14an, lehen lan-talde bilerak egin zituzten Gaztelekuan, aurrez proposatutako ekintzei forma ematen eta hauek antolatzen hasteko helburuarekin. Bilera horretan, futbito-txapelketa, pumptrack-a eta dantza-ikastaroa antolatzeko lehen urratsak eman zituzten.

Aurrerantzean, beste lan-talde batzuk ere aktibatuko dira, beste ekimen batzuk martxan jartzeko asmoz. Lehen bilera hauetan jasotako ideia eta ekarpenak landuz, ekintzei pixkanaka forma ematen joango dira. Nerabeek izango dute euren ideiak eta ekimenak aurrera eramateko ardura, prozesuaren benetako protagonistak bihurtuz.

Arroabeko nerabeak ere martxan dira. Udazkenean, Zumaiako eskolan egindako bileretan hainbat dinamiken bidez aurkeztutako proposamenak garatzen ari dira.

Otsailaren 17an egindako bileran, nerabeek jada festa batzordean parte hartzen ari direla azaldu zuten, eta aldi berean, Karmenetako futbito-txapelketa antolatzeko lehen urratsak ere eman dituztela adierazi zuten. Aurrerantzean, beraiek proposatutako ekintzei pixkanaka forma ematen jarraituko dute.

Udal ordezkari eta teknikarien iritziaz gain, prozesuan parte hartu duten nerabeen iritzia ere jakin nahi izan dugu. Gaztelekura gerturatu gara horretarako.

Jone Lizarralde, Aitana Ulazia eta Intza Kortadi

Adin tarte batekoontzat aukera gutxi dago eta Gaztelekua irekita dagoenean egoten garen arren, hortik kanpo ia ezer ez dugu. Horregatik, ideia ona iruditu zaigu Udalaren ekimena.

Urtarrilaren 31ko bileran nerabe asko elkartu ginen, bertaratu zirenen proposamenak entzun eta orain ideia horietako batzuk martxan jarriko ditugu elkarrekin. Agiroko kideekin elkarlanean, gaua pasatzeko plana eta herriko festei begira, balsa jaitsiera eta jaiak antolatzen laguntzeko prest gaude.

Gure ustez, garrantzitsua da herriko ekintzen antolakuntzan parte hartzea eta prozesuak nola funtzionatzen duen ikastea.

Bakr Saadi, Abdullah Sajjad, Osama Belameiri, Limam Mahfoud eta Nacer Bady

Kirola egitea gustuko dugu eta horrekin lotutako proposamenak egin ditugu. Uda partean eguraldi ona egiten duenean tira, baina negurako zerbait falta da. Ostiral eta larunbatetan Gaztelekura joaten gara, baina arratsaldez kiroldegira joatea ere gustatzen zaigu. Laranjadin futbolean ibiltzea debekatu zuten, Idiazpiko etxe azpian ere arazoak egon ziren, eta kiroldegian ere ez dago beti aukerarik eta ordutegirik denontzat.

16 urtetik beherakoentzat gimnasioa ere eskatu dugu, eta igerilekua ere proposatu genuen, nahiz eta ezinezkoa dela esan ziguten. Bide gorria ari direla egiten jakin dugu, eta pumptrack-a ere gustuko dugu, baina negurako aterpeak falta dira.

Udalak gure proposamenak jaso eta ahalegina egingo dutela esan digu, eta hori eskertzekoa da, lehen inoiz ez baitziguten iritzia eskatu. Orain, denon artean futbito txapelketa antolatzeko asmoa dugu eta antolakuntzan parte hartuko dugu.

Amaiur Arakistain, Haizea Iribar, Ane Zabala, Enaitz Larzabal, Ekhi Uranga, eta Markel San Juan

Lehenik eta behin, eskolan hainbat saio egin genituen, eta han jasotako ideiak urtarrilaren 31n jubilatuen tabernan aurkeztu zizkiguten. Bileran denok parte hartu genuen: lehenengo azalpenak entzun genituen, ondoren gure iritzia eman genuen, eta, azkenik, aurrera eramango diren ekintzak zerrendatu eta horietan parte hartzeko izena eman genuen.

Orain, ekintza horiek garatzeko bilerak egingo dira, eta bertan parte hartuko dugu, denon artean zer antolatu dezakegun erabakitzeko. Gainera, bileraren ostean merendola izan zen, eta gure ustez, horrek ere eragin handia izan zuen jende askok parte hartzeko.

Oihane Goikoetxea