Paperekoa

Hiri Antolamendurako Plan Orokorra (HAPO) ez da plano eta argazkien mapa hutsa. Herri baten bihotza nola antolatuko den kontatzen duen dokumentua da: nola haziko den, zer babestuko den, zein bide izango ditugun eta non egingo dugun topo elkarrekin. Planak gure egunerokoaren oinarria marrazten du, askotan konturatu gabe ibiltzen garen espazio horien logika berrituz.

Indarrean dagoen araudia 1996koa da, eta ordutik mundua, herria eta gure beharrak aldatu egin dira. Testuinguru horretan etorri  da HAPO berria, eta urriko Zestoako Udaleko osoko bilkuran hasierako onespena jaso ondoren, dokumentua jendaurrean dago. Orain herritarrok dugu hitza: urtarrilaren 15era arte aurkez daitezke alegazioak, zalantzak eta iruzkinak. Ez da tramite hutsa; herriaren etorkizunaren parte izateko aukera da.

Zer da HAPO bat?

HAPOk hiru galdera nagusi erantzuten ditu:

Eta gaur egun ezinbesteko bihurtu diren beste gai batzuk ere jasotzen ditu: mugikortasuna, ondarearen babesa, soziolinguistika, energia-eraginkortasuna eta ingurumen arriskuen kudeaketa.

Herrigune eta auzoetako norabide nagusiak

Zestoa – herrigunea

314 etxebizitza berri aurreikusten dira: 118 sozial, 62 tasatu eta 117 libre.
Eremu nagusiak estazioaren ingurua, Idiazpi mendebala, Artetxe–Arozena eremua eta Lizarraitz ingurunea izango dira. Arozena hotelaren lurretan erabilera mistoa planteatzen da, ostalaritza eta etxebizitza uztartuz.
Urbanistikoki, hutsik dauden orubeak aktibatzea, irisgarritasuna hobetzea eta ibaiari protagonismoa ematea dira gakoak. Horregatik, estazio zaharraren eta TS fabrikaren eremua gune berde zabala izatera igaroko da.

Arroabea

Auzo honek izaera herrikoia gordetzen du, eta bere garapena neurtua izango da.
Bertan 50 etxebizitza berri aurreikusten dira: 35 sozial eta 15 libre.
Bide seguruen antolaketa eta espazio publiko txikien hobekuntza dira lerro nagusiak, auzoaren erritmoa aldatu gabe.

Arroagoia

Mendixka gaineko ikuspegia duen auzoan 11 etxebizitza libre ageri dira dokumentuan.
Garapena mugatua izango da, paisaiaren eta egungo egituraren neurrira. Oinezko konexioak eta herrigunera jotzeko bideak hobetzea ere planteatzen da.

Aizarna

Auzoak bere izaera txikia eta trinkoa mantenduko du. 28 etxebizitza libre aurreikusten dira pilotaleku atzean, Santakutz kalean eta Asuntzio kalean.
Erabilera mistoen antolaketa eta irisgarritasuna hobetzea dira norabide nagusiak.

Lasao

Industria eta bizitegi eremuen arteko banaketa argituko da. Etxebizitza berririk ia ez da aurreikusten, baina bai mugikortasun seguruagoa eta bizikleta bidezko loturak Zestoarekiko.

Narrondo

Baserri-ingurune eta paisaia dira bertan protagonista. Uholde-arriskua duten eremuetan kontrol zorrotzagoak ezarriko dira, eta garapen berriek ez dute paisaiaren izaera aldatuko.

Iraeta

Auzoaren antolaketa sendotzea da helburua: bide seguruagoak eta gune aktiboagoak sortzea.
13 etxebizitza libre aurreikusten dira.

Etxebizitza turistikoak: mugak eta irizpideak

Planak arautzen du nola heda daitezkeen etxebizitza turistikoak:

– Beheko solairuan ez dira baimenduko (hau ondobeitu ber det)

– Lehen solairutik aurrera bakarrik, eta solairu osoa jarduerarako bideratuta (hau eztet ulertzen)
– Etxebizitza bakoitzak aparkaleku bat izan beharko du

Helburua bizitegi erabilera eta jarduera turistikoa orekatzea da, auzoen eguneroko bizitzari eutsiz.

Landa eremua eta korridore ekologikoa

Baserri eremuetan, gehienez hiru etxebizitza baimenduko dira, Eusko Jaurlaritzaren araudiak markatutako mugen barruan.
Bestalde, Azpeitia eta Errezilekin elkarlanean, korridore ekologiko bat lantzen ari da Udala, fauna eta paisaia babesteko.

Arlo transbertsalak

Soziolinguistika

Hizkuntza ez da hitzen kate soil bat; gure harremanen airea da. Auzo bat antolatzeko moduak, zein plaza, zein itzalgune edo zein pasabide dituen, askotan baldintzatu egiten du non eta nola sortzen diren elkarrizketak.

Zestoak euskararen arnasgune izaten jarrai dezan, HAPOk bildu egiten du urbanismoak hizkuntza-ohituretan duen eragina: espazioen antolaketa, mugikortasuna edo auzoen egitura izan daitezke hizkuntza baten eguneroko eszenatokiak.

Planarekin aurrera egin ahala, ikuspegi horrek pistak ematen ditu hizkuntzari buruz egin beharreko lanketa identifikatzeko, eguneroko bizitzaren dinamikei adi egonez.

Ingurumena

Ingurumena ez da planoen ertzean kolore berdez margotzen den eranskina: herriaren arnasa da.
Uholde-arriskuko eremuetan marraztutako mugak ez dira debeku hutsak; ibaiak bere erritmoa gorde dezan egindako pauso isilak dira. Lur kutsatuak identifikatzea herri baten memoria zaharra aireztatzea da, eguneko argira ekartzea. Eta gune berdeak sendotuz, ibaiari protagonismoa emanez eta mugikortasun jasangarriaren alde eginez, HAPOk etorkizuneko Zestoa marrazten du: argiagoa, arinagoa, ibaiaren erritmoa errespetatzen duena.

Orain dugu parte hartzeko aukera

Hasierako onespena emanda, dokumentua jendaurrean dago. Urtarrilaren 15era arte, herritarrek aukera izango dute HAPO irakurri, zalantzak partekatu eta proposamenak egiteko.
Urbanismoa ez da plano batean hasten eta bukatzen: gure herriak etorkizunean izango duen forma definitzen duen ariketa kolektiboa da honakoa.

Ohiana Calparsoro