Albisteak

Pasa den larunbatean (maiatzak 20), hezkuntzari buruzko jardunaldia burutu zen, eskola txikien festaren inguruan antolatzen den zazpigarrena. Eskola txikietako gurasoei zuzenduriko ekimena izan da. Bertan, esperientzia partekatu da Finlandiako Gobernuko hezkuntza mailako ordezkari batekin, Leo Pahkinekin, Hezkuntza Kontseilu Nazionaleko kidea. Honek hitzaldia eskaini zuen “Finlandiako hezkuntza sistema eta eskola txikiak: adin aniztasuna eta proiektutako lana” izenburupean. Ondoren, bertaratutakoekin talde dinamikan adin aniztasunari buruz solasaldia izan zuten.

Ekintza erabat arrakastatsua izan zen, Gipuzkoa guztitik Arroara etorritako 60 lagunek hartu zuten parte, eta oso gustura amaitu zuten. Gehiagoren gosez gelditu zirela esan daiteke. Bai hitzaldia eta bai talde solasa luzatzeko gogoz geratu ziren parte hartzaileak, hamaiketakoa bera ere di-da batean egin zuten denbora irabazteagatik. Leo Pahkinek hitzaldia suomieraz egin zuen eta Joseba Ossa izan zuen ondoan bere adierazpenak euskarara itzultzen.