Albisteak

Indarkeria matxistarekin amaitzeko aldarria egin dute zestoarrek

— 2023-11-25

Indarkeria Matxistaren Aurkako Egunean elkarretaratzeak egin dituzte gaur Zestoan. Indarkeria matxistarekin amaitzeko aldarria egin dute bai mugimendu feministak zein Itaia emakumeen antolakunde sozialistak.

2023. urtean zehar indarkeria matxistak erauli dituen biktimak gogora ekarri dituzte bai hitzez bai herriko paretetan ipini dituzten afixetan ere. Indarkeria gure egunerokotasunean maila ezberdinetan txertatua dagoela azalarazi dute . “…aipatu ditudan datuak indarkeria matxistaren icebergaren punta dira. Baina hitzak, begiradak, pentsamenduak, jarraipenak, oihuak, barreak, mehatxuak, keinuak, xuxurlak, aginduak, mespretxuak ere indarkeria dira.” salatu du Mugimendu Feministaren bozeramaileak eta honekin amaitzea guztion ardura dela zehaztu du.

Itaiak bere aldetik instituzioa eta berdintasun politiken eraginkortasun eza azpimarratu ditu. “adibidea dugu Espainiako Estatuan pil-pilean egon den “Soilik baietz da baietz” lege entzutetsua bera. Alderdi politiko bakoitzak ika-mika instituzionalerako erabili du honako legea: ezkerrak bere aurpegi aurrerakoia erakusteko eta eskuinak ezker gobernua ahultzeko. Baina politika horien atzean alderdi politiko bakoitzaren eta bertako burokraten interes politiko eta pertsonalak ezkutatzen dira, inondik inora ez emakume langileon interesak.” Horren aurrean: industria kulturalari eta erakundeei aurre egin, indarkeria jasan duten emakumeei babesa bermatu eta erasotzailearen aurkako jarrera irmoa izan behar dela adierazi du emakumeen antolakunde sozialistak.

Azaroaren 30ean greba orokorrera batzeko deia

Bi mugimenduek, azaroaren 30ean, zaintza eskubide kolektiboaren alde egingo den greba orokorrera batzeko deia eginez amaitu dute euren saioa. Mugimendu Feministako taldeak, ostegunerako duen agenda ekarri du gogora eta Itaiak Donostian eguerdiko 13:00tan egingo den manifestaziorako deialdia aurkeztu du.

Zestoako egitaraua:
• 9:00 – Herri Bira
• 11:00 – Egoitzetara hurbiltzea
• 12:00 – Elkarretaratzea
• 19:00 – Ekitaldi Nagusia

*Ekitaldi guztietarako herriko plazan elkartuko gara

*Ekimen guztiak mistoak izango dira

Irakurle, gure webgunean albiste hau irakurri baduzu, publizitate eta erakundeen diru laguntzez gain, urtero 30 euroko diru ekarpena egiten duten 350 bazkidetik gora ditugulako izan da. Mila esker bazkide! Herri eta auzoetako berri euskaraz emanez, normalizaziora bidean gure ekarpena egiten jarraitu nahi dugu. Proiektua sendotzen lagundu nahi baduzu, egin zaitez bazkide.

Egin zaitez bazkide