Albisteak

Foru Aldundiak onartutako eraikuntza-proiektuak 3,2 milioi euroko lizitazio-aurrekontua izango du eta bederatzi hilabetean lana egitea aurreikusten da.

Gobernu Kontseiluak Narrondo eta Iraeta arteko bidegorriaren eta oinezkoen bidearen eraikuntza-proiektua onartu du apirilaren 1ean. Zumaia eta Zestoa arteko jarduketa honek, foru bozeramailearen hitzetan, “Urolako Bide Berdea osatzea eta, bide jarraitu bat egitea ahalbidetuko du, Zumaiatik Zumarragaraino, 36 kilometroko ibilbidean, Urolako trenbide zaharraren trazadura jarraituz; balio natural eta kultur handiko inguru batean, Gipuzkoaren bihotzean”.

Tarte berriak 4,15 kilometroko luzera izango du, eta 3.220.462,87 euroko lizitazio-aurrekontua. Obraren exekuzio-epea bederatzi hilabetekoa izatea aurreikusten da. Jarduketa hau Gipuzkoako Bidegorri Sarearen Lurralde Plan Sektorialaren barruan kokatzen da eta Europako Batasunaren Berreskuratze, Eraldaketa eta Erresilientzia Planaren –NextGenerationEU– finantzaketa jaso du.
Foru bozeramaile Irune Berasaluzek oso positiboki baloratu du proiektuaren onarpena: “Gipuzkoako Bide Berdeen sarea ez da azpiegitura hutsa: mugikortasun iraunkorrago, seguruago eta konektatuago baten aldeko apustu sendoa da. Tarte berri honekin, trazadura ingurumenarekin integratzea funtsezkoa izan dena, ekialdetik mendebaldera Gipuzkoa lotzeko pauso erabakigarria ematen dugu; herriak elkartuz eta ingurunea biziberrituz, lurraldeaz modu osasungarrian gozatzeko aukerak irekitzen dituen bide berde baten bidez.”
Berasaluzeren hitzetan, “kalitatezko eta konektatutako bidegorri-sare baten alde egiten dugu, herritarren gero eta eskaera handiagoari erantzunez; sare honek ez ditu soilik bizikletazko joan-etorriak erraztuko, baizik eta mugitzeko eta lurraldearekin harremanak izateko gure modua eraldatzen lagunduko du”.
Onartutako proiektuak Narrondo, Arroabea eta Iraeta konektatuko ditu, erabilgarritasuna, segurtasuna, iraunkortasuna eta paisaian integratzea bermatuko duen trazadura baten bidez. Tarte berri honek lurraldeko Bide Berdeen 5. ibilbideari jarraipena emango dio eta etorkizuneko 2. ibilbidearekin ere lotuko da, Mutrikurantz.
N-634 errepidearen ondoan doan zatian, plaka albeolarrekin osatutako egiturak, oinezko eta txirrindularientzako seinaleztatutako pasabide seguruak, bereizketa eta segurtasun elementuak, eta malda leuneko arrapalak eraikitzea aurreikusten da. Arroabetik aurrera, trazadura Urolako trenbide zaharraren plataforma osoa baliatuz egingo da, ibilbidea irisgarriagoa eta ingurumen-inpaktu txikiagokoa izan dadin. Bertan garbiketa lanak, zoladuraren berrikuntza, kaltetutako elementuen ordezkapena eta seinaleztapenaren eta argiteria sistemaren instalazioa egingo dira.
Ibilbide osoan argiztapena egongo da, baita AP-8 eta GI-631 azpiko pasabideetan ere; gainera, euri-uren hustubide eta drainatze sistema egokiak izango ditu, eta aurrez afekzioak zeuden guneetan konponbide espezifikoak hartuko dira kontuan.