TS Fundicioneseko langile ohi batek “diskriminazio sindikala” jasan duela salatu dute

TS enpresako LAB sindikatuko langile ohiek adierazi dutenez, beraien lankide izandako batek “diskriminazio sindikala” jasan duela salatu dute. Hori dela eta ondorengo oharra argitaratu dute:

Urteak dira T.S. Fundiciones enpresa ITXI zela. Itxiera horren aurrean langileok gure etorkizuna eta lanpostuak bermatzeko bideari ekin beste erremediorik ez genuen izan. Bakarren batek itxieraren erantzukizuna langileon bizkar utzi nahi izan zuen arren.
Garai luze, zail eta gogorrak izan ziren haiek, oraingoak xamurragoak ez direlarik. Baina argi geratu dira borroka haren helburu duinak. Gaur egun gutariko batzuk GRI Castings enpresan lanean eta beste batzuk bertako parte izateko zain gaudelarik. Langileok genion bezala, T.S. Fundiciones etorkizuna zuen proiektua zela argi geratu da.
Hori bai, gogoratu nahi dugu, kalera bota gintuzten jabeek, zorrak utzi zituzten arren hornitzaileekin, udalekin eta langileekin, ez dutela inolako erantzunkizunik edo ondoriorik jasan. Horrela dago legedia.
Oraindik kanpoan zai gaudenok ordea, edonoren gisa, aurrera ateratzeko lan bila gabiltza han eta hemen. Guztiok jakitun garen zailtasunekin, gaurko merkatuan tokitxo duin bat egitea zer den jakinik.
Arazoa: jakin dugu TS Fundicioneseko jabeetako bat azpijokoan dabilela, tailer txiki batzuen gain presioa egiten, TS Fundicioneseko langileak ez kontratatzeko. Azken adibidea, duela aste batzuk gertatutakoa da: bere enpresa bateko hornitzaile bati, TS Fundicioneseko langile ohi bat kaleratzeko exijitu dio, hornitzailearekin lana egiteari uzteko mehatxupean.
TS Fundicioneseko langileok aurrera egin nahi dugu, eta lanpostu bat lortu duintasunez bizitzeko. Baina ez dugu ahazten sufritu genuen guztia. Bada, enpresaren itxieraren eta zorrak uztearen erantzule direnen partetik ez ditugu horrelako mehatxu eta diskriminazioak onartuko. Hurrengo asteetan, mehatxu eta diskriminazioarekin amaitzeko kanpaina bat jarriko dugu abian.
Lehen eta orain duintasunez lan egiteko eskubidearen alde borrokatuko dugu. Eta ez dugu Kazikerik onartuko gure eskualdean.

Gora langile borroka!

T.S. FUNDICIONESEKO LAB-EKO LANGILE OHIAK




Irakurle, gure webgunean albiste hau irakurri baduzu, publizitate eta erakundeen diru laguntzez gain, urtero 30 euroko diru ekarpena egiten duten 350 bazkidetik gora ditugulako izan da. Mila esker bazkide! Herri eta auzoetako berri euskaraz emanez, normalizaziora bidean gure ekarpena egiten jarraitu nahi dugu. Proiektua sendotzen lagundu nahi baduzu, egin zaitez bazkide.

Egin zaitez bazkide