Albisteak

Atzo arratsaldean, Udalbatzarra egin zen udaletxeko aretoan eta bertan onartutako gai nagusiena Udalaren barne antolaketan egindako birmoldaketa izan zen. Legealdiaren erdialdera iritsita, hainbat aldaketa gauzatuko dira datozen asteetan. Aurreko legealdian, Mikel Arregi alkatea izan zen liberatuta zegoen pertsona bakarra, baina oraingoan, alkatearekin batera, beste pertsona bat ere liberatuta dago, alkate-ordearen kargua hartzen duena.

Orain arte, Zigor Plazaolak izan du lehen alkate-ordearen eta hirigintza burua izatearen ardura, baina aldaketa honekin, Zigorrek liberazioa utzi egingo du, eta bere ordez, Lorea Ilundain izango da kargu horren arduraduna. Lorea Ilundain, orain arte auzo eta baserrietako zinegotzi izan dena, martxoaren erdialdetik aurrera izango da hirigintzaren arduraduna eta lehen alkate-ordea.

Bestalde, Udalbatzan EH Bilduk eta EAJ-PNVk elkarrekin adostuta, martxoaren 8ko mozioa onartu zen. Horrez gain, Udalak herriko mugimendu feministak martxoaren 8rako antolatutako ekitaldi guztietan parte hartzera deitu ditu herritarrak.