Urola Erdiko EH Bilduk, Zestoako Txoko feministak larunbaterako deitu duen elkarretaratzearekin bat egin du

Urola Erdiko EH Bildutik jasotako prentsa oharra:

Elkartasuna ez da delitua, abenduaren 22an Zestoan elkartuko gara

Indarkeria matxista sufritzen duen biktima batek bizkarrean duen zama areagotzen ikusi dugu hainbat kasutan. Bere sufrimendua gutxi ez, eta instituzioek beste aldera begiratzea, justiziak babesik gabe uztea edota bere kontakizuna zalantzan jartzea dira adibideetako batzuk.

Azken hilabeteetan urrats nabarmenak egin dira egoera salagarri horiek guztiak azalarazteko, eta nola ez, herria eta herritarrak dira horren motorra. Herritarrak izan dira lehenak kalera irten eta biktimei elkartasuna adierazten; egoera salatu dute, eta bestelako gizarte eredu bat aldarrikatu dute.

Oraingoan Zestoan gertatu da, emakume bati laguntza eman dioten hainbat herritar epaitegian salatuak izan dira. Babesa adierazteagatik, elkartasunezko jarrera izateagatik. Guk argi daukagu, emakume bat babesteak ezin du delitua izan.

EH Bildutik egoera hau salatu nahi dugu, eta gure babes osoa adierazi elkartasunezko jarrera izan eta salatuak izan diren herritarrei, tartean Zestoako EH Bilduko udal ordezkari bati. Genero injustiziari eremu guztietan aurre eginaz bakarrik lortuko dugu gizarte solidario eta justuago bat. Horregatik, Zestoako Txoko Feministak, abenduaren 22, larunbaterako, Zestoako plazan 19:00etarako deitu duen elkarretaratzearekin Urola-erdiko EH Bilduk bat egiten du.

Jarri gaitezen euren oinetan

Sinesten dizugulako, elkartasunari erasorik ez

Urola Erdiko EHBildu




Irakurle, gure webgunean albiste hau irakurri baduzu, publizitate eta erakundeen diru laguntzez gain, urtero 30 euroko diru ekarpena egiten duten 350 bazkidetik gora ditugulako izan da. Mila esker bazkide! Herri eta auzoetako berri euskaraz emanez, normalizaziora bidean gure ekarpena egiten jarraitu nahi dugu. Proiektua sendotzen lagundu nahi baduzu, egin zaitez bazkide.

Egin zaitez bazkide