Albisteak

Zestoako hirigune historikoa hobeto ezagutzeko aukera ‘Ezkutuko altxorrak’ programari esker

— 2020-08-26

‘Ezkutuko altxorrak’ programaren baitan, Zestoako alde zaharra hobeto ezagutzeko aukera izango da larunbatean, abuztuak 29. Hasiera batean, bisita honetan Gipuzkoako bainuetxedun herri bakarraren distira eta oraina gogoratzea zen helburua, Zestoako bainuetxea eta ur termalak protagonista izanik. Bainuetxea itxita dagoela ikusita, Vicente Davilaren gidaritzapean Zestoako hirigune historikoan eta bertako historian barrena egingo da, Erdi Aroko garaietatik hasi eta Loiolako Iñigoren garaira arte. XVI. mendeko parrokia-eliza nabarmena ere bisitatuko da. Ibilbidea 12:00etan hasiko da Zestoako udaletxe azpitik.

Ibilbidea doan izango den arren, Urola Erdiko bisitetan parte hartzeko aurrez izena ematea gomendatzen da Loiolako Turismo bulegoan (943 151 878 telefono zenbakian edota info@tierraignaciana.com posta elektronikoan).

OHARRAK

COVID-19ak sortu duen egoera dela eta programaren nondik norakoak moldatu egin dira:

Bisita eta jarduera ia gehienak aire librean izango dira.
Partehartzaile bakoitzak norbere maskara eraman beharko du. Eskuak garbitzeko gela antolakuntzak jarriko du.
Bisitako gehienez 15 laguneko kopurua onartuko da. Segurtasun tarteak mantentzeko gomendio eta gogorarazpenak gidak egingo ditu.

Irakurle, gure webgunean albiste hau irakurri baduzu, publizitate eta erakundeen diru laguntzez gain, urtero 30 euroko diru ekarpena egiten duten 350 bazkidetik gora ditugulako izan da. Mila esker bazkide! Herri eta auzoetako berri euskaraz emanez, normalizaziora bidean gure ekarpena egiten jarraitu nahi dugu. Proiektua sendotzen lagundu nahi baduzu, egin zaitez bazkide.

Egin zaitez bazkide