Kaixo!
Atzeratuta gabiltza tartean oporrak izan ditugulako, baina ez, horregatik, ahaztuta. Etxean jasotako alean irakurri ahal izan zenuten bezala, Zestoako Musika Banda zen otsaileko pisten erantzuna. Keinutxoa egin nahi izan genion, urte hauetan guztietan herritarrak alaitu eta dantzan jartzeko egin duen (eta egiten duen) ahaleginagatik. Garbi dago jaiekin lotura zuzena duela, baina urtean zehar emanaldi gehiago ere egiten ditu eta aurten, gainera, berrikuntza moduan, kontzertu didaktikoa eman du Herri Eskolako haurrekin. Bejondeiela herriko musikari guztiei!

Nortzuk bidali zeniguten erantzun zuzena? Honako hauek guztiek: Arantxa Zigaran, Helene Olabide, Vydia Iglesias, Eneko Korta, Maddi Luluaga, Maite Odriozola, Iñaki Odriozola, Idoia Errasti eta Patxi Aramendi. Eskerrik asko guztioi parte hartzeagatik. Esan beharra dago, gero eta luzeagoa dela urritik hona hitz ezkutuak asmatu dituzuenon zerrenda. Ekainean egingo dugun zozketan aukera gehiago izateko, badakizue zer egin behar duzuen: jarraitu erantzunak bidaltzen!

Horretarako, hemen duzue martxoan argitaratutako asmakizuna. Zer ote da?

1- Antzina zenetik hona funtzioa aldatu du.

2- Udalerri osoa zeharkatzen du.

3- Konpondu beharreko oztopoak ditu.

4- Koloreak ematen dio izena.

JOLASAREN ARAUAK:

• Hilero 4 pista emango ditugu hitz bat (edo kontzeptu bat) asmatzeko.
• Asmatu beharreko hitzak Zestoarekin harremana izango du.
• Erantzunak hilaren 20a baino lehen bidali beharko dira:
  • E-posta: zestoa@aek.eus
  • Mezua edo whatsapp-a: 670 420 048
• Ikasturte amaieran SARIA zozketatuko da (bazkari edo afari bat). Asmatzaile guztiak sartuko dira zozketan; zenbat eta gehiagotan asmatu, aukera gehiago saria eskuratzeko!