Albisteak

Ekain Guraso Elkarteak baserritar erropen bilketa berezia antolatu du azaroaren 18tik 28ra, herriko hainbat ekintzatan umeek erabili ohi dituzten jantziak eskuragarriago izan daitezen. Elkarteak azaldu duenez, hainbat familiak etxean gordeta dituzte jada erabiltzen ez dituzten arropak, eta horiek berrerabiltzea izango da egitasmoaren helburu nagusia.

Bilketa eskolako sarreran jarriko den kutxa batean egingo da, eta mota askotako arropak onartuko dira: alkandorak, gonak eta prakak; txapelak, zapiak eta jertseak; baita baserritar estiloari lotutako osagarriak ere, esaterako gerrikoak edo alpargatak.

Ekain Guraso Elkartetik adierazi dutenez, bildutako jantziak eskolako eta herriko jaialdi zein ekintzetan umeek erabiltzeko izango dira, eta, era berean, premia duten familiei laguntza ematea izango da bilketaren beste helburu nagusietako bat.