Albisteak

Iragan astean hasi zituzten santaines jaien ospakizunak Iraetan eta asteburu honetan ere izango da zer egina auzoan. Ostiralean XXXII. mus txapelketa azkarra jokatuko da Bekoetxe tabernan, iluntzeko 22:30ean hasita. Parte hartu nahi duten bikoteek 22:00etan eman beharko dute izena, 30 euro ordainduta. Lehenengo sailkatuek 1.000 euro, txapelak eta trofeoak eskuratuko dituzte; bigarrenek, 400 euro eta trofeoak; hirugarrenek 200 euro, eta laugarrenek 100 euro.

Larunbatean amaituko dira aurtengo festak. Eguerdian, pintxo lehiaketa egingo dute Gure Ordeka elkartean, eta ondoren pintxoak jango dituzte. Arratsaldeko 17:00etan umeentzako puzgarriak izango dira frontoian, eta 17:30ean Iraetako trena zabalduko dute haur eta familientzat. Festei amaiera biribila emateko, txokolate beroa prestatuko dute arratsaldeko 18:00etan.