Albisteak

Jokin Artetxek Izarraitzen aurkitutako Eskarabilera pertsonaiaren buruaren bila etorriko dira bihar ehun basauriar inguru.

Basauriko jaietako ohitura da festei amaiera emateko buruhandia aireratzea. Basauriko festetako pertsonaia nagusia da Eskarabilera. Buru gainean ikatza eramaten zuten aitzinako emakumeei egiten die erreferentzia. Urtero txandakatzen joaten dira 16 kuadrilla, aurtengoan, Aldatxaren txanda izan da. Ohikoa Eskarabilera burua inork ez aurkitzea izaten bada ere, 2024ko festetan jaurtitakoa, urria amaieran Jokin Artetxe arroarrak topatu zuen Izarraitzen oilagorretan zebilela.

Jokinek orduan kontatu zigunez, Izarraitzen oilagorretatik bueltan kotxera zetorrela urrutira ikusi zuen buruhandi moduko bat. Gerturatu eta atzealdean mezua zuela konturatu zen: “¡Eres el afortunado!” zioen. “Bertan jartzen zuen zer egin behar nuen, nora deitu… aurkitzen zuenarentzat 150 euroko ordainsaria egongo zela ere jartzen zuen” kontatu zigun Artetxek. Kotxetik 500 metrora omen zegoen. “Edonork ikusita ere, hau nora doa buruhandi zahar horrekin?” pentsatu omen zuen bere baitan. Kasualitatez Jokinen koinata Basaurikoa da eta hari deitu zion beste zerbait argitu nahian. Sorpresaz hartu omen zuen albistea “atzo ikusi genuen burua hegan eta jada agertu da? eta, gainera, Zestoan?” esan omen zion. Urte batean Normandian agertu omen zen, beste batean Txekiar errepublikan, baita gertuago ere, Ibarrangelun…

Aldatxako kideen arabera, goizeko 11:00 aldera iritsiko dira herrira. Basauriarrak beraien jaietako jantziarekin etorriko dira, baita banderak, globoak eta bestelako apaingarriekin ere. Eguerdiko 12:00etan, Jokin Artetxek buruhandia itzultzeko ekitalditxoa egingo dute plazan. Ondoren, herrian zehar poteoa egingo dute musika eta  jolas batzuekin girotuta.

Barrenean 2024ko jaietan Eskarabilera aireratu zeneko unea: