Albisteak

‘Euskaraz gozatu nahi dut’ kanpaina jarri du martxan Zestoako Udalak

Egitasmoaren baitan, ipuin-kontaketak, film emanaldiak eta jolasak antolatu ditu Udalak. Azaroan zehar luzatuko dira ekintzak eta ipuin-kontaketetan parte hartzeko aurrez izena eman beharko da.

Euskarazko produktuen kontsumoa bultzatzeko asmoz, Euskaraz gozatu nahi dut kanpaina jarri du martxan Zestoako Udalak. Egitasmoaren helburua, euskarazko kontsumoa bultzatzea da. Izan ere, euskara foroan behin baino gehiagotan agertu izan da gai horren inguruko kezka.

Orain arte, euskarazko produktuen katalogoa paperean bidaltzen zen etxe guztietara baina Nerea Odriozola euskara zinegotziak adierazi duenez, hainbat gurasorekin hitz egin ostean, katalogoa paperean banatzeari utzi eta estrategia eraginkorrago bat martxan jartzea erabaki du Udalak. Aurten, beraz, katalogoa paperean ez da banatuko baina horren ordez, ekintza ezberdinak izango dira, katalogoko produktuak herrira gerturatu eta ezagutarazteko helburuarekin.

Ekintza ezberdinak

Estrategia berriaren baitan, ipuin-kontaketak, film emanaldiak eta jolasak antolatu ditu Udalak. Lehen ipuin-kontaketa saioa, datorren asteartean, hilak 9, izango da, Aiala Etxaberen eskutik. Azaroaren 19an, berriz, Barbantxo aisialdi taldearekin jolasak izango dira eta azaroaren 22 eta 24an, ipuin-kontaketa saioak eskainiko dituzte Ruben LarraƱagak eta Esti Zabalak. Egitasmoa amaitzeko, bi filmen emanaldia izango da azaroaren 28an, Kultur Etxeko areto nagusian.

Egitaraua:

  • Azaroak 9, asteartea: Ipuin-kontaketa Aiala Etxaberekin, arrasaldeko 17.30ean, liburutegian. Adina: HH5 eta LH 1. maila (Aurrez izena eman behar da 688 684 029 WhatsApp zenbakian).
  • Azaroak 19, ostirala: Haurrentzako mahai-jolasak Barbantxo Aisialdi taldearekin (taldea beteta dago)
  • Azaroak 22, astelehena: Ipuin-kontaketa Ruben LarraƱagarekin, arratsaldeko 17:30ean, liburutegian. Adina: HH5 eta LH1 1 eta 2. maila (Aurrez izena eman behar da 688 684 029 WhatsApp zenbakian).
  • Azaroak 24, asteazkena: Ipuin-kontaketa Esti Zabalarekin, arratsaldeko 17:30ean, liburutegian. Adina HH4tik gorako haurrentzat (Aurrez izena eman behar da 688 684 029 WhatsApp zenbakian).
  • Azaroak 28, igandea: Euskarazko filmen emenaldia Kultur Etxeko areto nagusian. Arratsaldeko 16:30ean, Grufaloa filma eta 17:45ean, Pirata arratoia.



Irakurle, gure webgunean albiste hau irakurri baduzu, publizitate eta erakundeen diru laguntzez gain, urtero 30 euroko diru ekarpena egiten duten 350 bazkidetik gora ditugulako izan da. Mila esker bazkide! Herri eta auzoetako berri euskaraz emanez, normalizaziora bidean gure ekarpena egiten jarraitu nahi dugu. Proiektua sendotzen lagundu nahi baduzu, egin zaitez bazkide.

Egin zaitez bazkide