Albisteak

“Feminismoak egiten gaituelako herri!”

— 2017-03-09

2017ko Emakumeen Nazioarteko Eguna trikiti doinuz dantzatuz eta abestuz ospatu zen Zestoan. Plazatik hasita ordu erdi inguruko kalejira egin zuten Zestoako kaleetan. Zestuko Trikitixa elkarteko kideek giro ederra jarri zuten kaleetan, hainbat trikitilari eta pandero jotzailerekin.

Kalejira amaitzean Zestoako Txoko Feministako kideek idatzi bat irakurri zuten megafonai bidez. “Denok gaude borrokatzera kondenatuta. Guk badugu ordea beste kondenatu batzuek ez daukaten zerbait, guk geure ipuina idazteko asmoa daukagu. Hasiera kontatu dizuegu eta korapiloa aldaketa sozial eta politiko baterako bidea da, bizitza erdigunera ekarriko duena (…) Ez da ezusteko amaiera duen ipuin horietako bat, denok baitakigu Eskal Herri feminista eta burujabe batekin amaituko dela” zioen idatziaren pasarte batek. “Feminismoak egiten gaituelako herri!” esaldiarekin amaitu zuten adierazpena.

Ekitaldiari amaiera kantuan eman zioten Zestoako plazara gerturatutakoek. Azpiko bideo honetan amaierako abestia ikus dezakezue:

Irakurle, gure webgunean albiste hau irakurri baduzu, publizitate eta erakundeen diru laguntzez gain, urtero 30 euroko diru ekarpena egiten duten 350 bazkidetik gora ditugulako izan da. Mila esker bazkide! Herri eta auzoetako berri euskaraz emanez, normalizaziora bidean gure ekarpena egiten jarraitu nahi dugu. Proiektua sendotzen lagundu nahi baduzu, egin zaitez bazkide.

Egin zaitez bazkide