Albisteak

Igande iluntzean amaitu ziren aurtengo amabirjinak, eta Mikel Arregi alkateak jaien inguruko balorazio “baikorra” egin du. Herriguneko zein auzoetako festak -Arroabekoak, Arroagoikoak, San Lorentekoak eta Aizarnakoak- “arrakasta handikoak” izan direla esan du, eta “jai giro sanoa” izan dela nabarmendu du. Horrez gain, herritarren parte hartzea “handia” izan dela azpimarratu  du.

Arregik esan du beste herri batzuetan izan diren gertakari tamalgarrien berririk ez dugula izan gurean: “Festa egunetan tratu ona eta poza izan dira nagusi. Halere, eragile ezberdinekin izandako elkarlanari esker, antzeko kasuren bat gertatu ezkero era koordinatuan neurriak hartzeko prestatuta egon gara” azaldu du. Alkatearen arabera, aurtengo jai nagusietan ondare publikoak ez du kalterik jasan, baina hala ere, jaietan sortzen den zabor pilaketak “zer pentsatua” eman beharko ligukeela gaineratu du.

Antolatu diren ekitaldiei dagokienez, “oso jendetsuak” izan direla azpimarratu du: “Anttonen herritarraren aldeko herri bazkarian inoiz baino jende gehiago izan da, denok dakigun arrazoiengatik txistularien alardea ezin izan da plazan egin baina hala ere aurtengoa ekitaldi arrakastatsua izan da, zezenketak, herri bazkariak, musika ekitaldiak, pilota, dantza, bertsoak, artzain txakur txapelketa…”.