Albisteak

Frontoi zaharreko ezker pareta konpontzen hasi dira

— 2020-07-15

Martxan dira Zestoako frontoi zaharreko ezker pareta konpontzeko lanak. Frontoia aire librean dagoenez, euriaren ondorioz ur asko sartzen da horman eta ezker pareta ustelduta zegoen, zulo askorekin. Udal brigada ari da pikatze lanak burutzen eta ondoren enpresa batek hormigoiz estaliko du guztia, pareta trinko-trinko eta txukun gera dadin.

Abantzu Pilota Klubak urte askotan zehar jaialdietako sarreren bitartez izandako superabita Udalaren esku jartzea erabaki zuen, baldin eta Udalak pilotarekin lotutako azpiegituta batean inbertitzen bazuen. Zati bat lan hau burutzeko izango da. 10.000 euro inguruko kostua izango du eta lanak datozen egunetan amaitzea aurreikusten da.

Harmailak eta frontoi inguruaren bulebarizazioa

Orain frontoi zaharreko ezker pareta konponduko den arren, epe motzean garatzeko beste hainbat proiektu ditu Udalak. Orain aulkiak dauden lekuan harmaila iraunkorra eraikiko da eta herritarren irisgarritasuna hobetzeko asmoz egun dauden koska handi horietan eskaileratxo batzuk egingo dira.

Horrekin batera, Laiak dendatik gurutzera bitarteko zatia bulebarizatzea ere aurreikusten da. Ibilgailuek bertatik ibili ahal izango dute, baina oinezkoentzat izango da.

Lan guzti hauek zatika egingo dira eta 2020ko azarorako dena bukatuta izatea da Udalaren nahia.

Irakurle, gure webgunean albiste hau irakurri baduzu, publizitate eta erakundeen diru laguntzez gain, urtero 30 euroko diru ekarpena egiten duten 350 bazkidetik gora ditugulako izan da. Mila esker bazkide! Herri eta auzoetako berri euskaraz emanez, normalizaziora bidean gure ekarpena egiten jarraitu nahi dugu. Proiektua sendotzen lagundu nahi baduzu, egin zaitez bazkide.

Egin zaitez bazkide