Albisteak

Hamar upategik hartuko dute parte Laiak dendak antolatutako VI. ardo dastaketan

— 2019-10-17

Datorren larunbatean, hilak 19, izango da hitzordua, eguerdiko 12:30ean hasita, kiroldegiko aterpean.

Laiak dendak seigarren urtez antolatutako egitasmoa da aurtengoa eta inoiz baino upategi gehiagok hartuko dute parte larunbateko dastaketan, guztira, hamar izango dira. 20 ardo ezberdin dastatzeko aukera izango da: bost urteko ardo beltz, bederatzi txuri eta sei ardo ondu. Jatorri ezberdinetako ardoak izango dira: Ribera del Duero, Arabar Errioxa, Errioxa, Rueda, Rias Baixas eta Bizkaiko Txakolina.

Edateaz gain, bapo jateko aukera ere egongo da. Lopene harategiko, Basatxerriko, Marduko eta Maisorreko produktuez gozatu ahalko dute bertaratzen direnek. Txorizoa eta hirugiharra parrilan, urdaiazpikoa edota solomoa jateko aukera egongo da besteak beste.

Urtero legez, musikarik ere ez da faltako eta Ustekabe txarangako kideak arduratuko dira giroa alaitzeaz.

Irakurle, gure webgunean albiste hau irakurri baduzu, publizitate eta erakundeen diru laguntzez gain, urtero 30 euroko diru ekarpena egiten duten 350 bazkidetik gora ditugulako izan da. Mila esker bazkide! Herri eta auzoetako berri euskaraz emanez, normalizaziora bidean gure ekarpena egiten jarraitu nahi dugu. Proiektua sendotzen lagundu nahi baduzu, egin zaitez bazkide.

Egin zaitez bazkide