Albisteak

Argazkia: Lili Jauregia

Lili Jauregiko bisita antzeztuak martxan dira gaurtik, hilaren 19tik, aurrera. Lilitarren Ohorea izenburupean, datu historikoetan oinarrituriko antzezpena da, ikerketa historikoetan oinarritutako gidoi landua duena. Andre Madalen da antzezpeneko protagonista, XVII. mendeko euskal emakumea eta lilitarren leinuko azken biztanlea. Bisitan zehar, bakarrizketa baten bidez, jauregia bera eta nortasun handiko euskal emakume baten bizipenak ezagutzeko aukera dute bisitariek.

Gaurtik abenduaren erdialdera arte luzatuko da denboraldia. Igande eta jaiegunetan, 11:30ean euskaraz eskainiko da bisita, eta 12:30ean, berriz, gaztelaniaz. Larunbatetan, 16:30ean eta 17:30ean izango dira saioak, biak gaztelaniaz. Talde bateko partaide izanez gero, ordea, programatutako ordutegitik kanpo saioak erreserbatzeko aukera dago.

Bisitetarako sarrerak aldez aurretik erostea gomendatzen dute antolatzaileek, plazak mugatuak baitira. Horretarako, beraien webgunean eros daitezke online, edo Ekainberriko Sarrera Salmenta Bulegoan.