Albisteak

Zestoan “Herri Hezitzailea” proiektua abiatzear da. Proiektu horrek haurren interesetatik abiatuta, aniztasunarekiko (sexu, arraza, sinesmen, ideologia…) eta ingurunearekiko (naturala eta kulturala) errespetuan oinarritutako komunitatea sortzea du helburu. Horrela, asteazken honetan (abenduak 16) 18:30etan ekimenaren aurkezpena izango da Kultur Etxean.

Zestoako Herri Ikastetxea eta Zestoako Udala dira ekimen horren bultzatzaileak. Antolatzaileen esanetan, “gure haur eta gazteen heziketa ez da eskolaren ardura soilik, komunitate osoak, herri osoak hezten du, nahi gabe ere, eredua ematen baitiegu. Beraz, ardura har dezagun komunitate mailan, gure haur eta gaztetxoentzat nolako herria nahi dugun pentsatzeko. Izan ere, haur eta gazteak herrian aktibo eta presente dituen herria soilik izan baitaiteke guztiontzako herria”. Antolatzaileek herriko norbanako eta elkarte guztiak gonbidatu dituzte aurkezpenera.