Albisteak

Ikuskizun bikaina izan zen igande arratsaldean Zestoako Plazan, 2016ko Zestoako Txistulari alardea. “Honen helburua zestoarrei aupada bat ematea da. Erakutsi nahi dugu herrian badagoela gaia, sormena eta fundamentua kultur ekitaldiak antolatzeko” zioen Jon Artano aurkezleak, Idiakaitz Txistulari Taldekoen adierazpenak oholtzara eramanaz. Zorionak Idiakaitz Txistulari Taldeari eta Garaikoitz Mendizabal alardeko zuzendariari, helburua bete baitute.

Eguraldia lagun, Zestoako Plaza bete egin zen Txistulari Alardea ikusteko. 50 bat txistularik, Zumaiako San Pedro abesbatzak, Metal Boskoteak, Niko Etxartek, Gorka Sarriegik, Karmelo Mendizabal akordeoi-jotzaileak, Eider Iraola eta Aizpea Aristi abeslariek, Aitor Salegi bertsolariak, Elgoibarko dultzaineroek, Zestoako Itxaropena dantza taldeak, Iñaki Telleria bateria-jotzaileak eta Amaiur Caravajille baxu-jotzaileak hartu zuten parte alardean, besteak beste.

Guztia batuta, ikuskizun bikaina, ikuskizun mundiala izan zen Zestoako Plazan. Aitor Salegi bertsolari zestoarrak bikain azaldu zuen bertsoz: Bai Niko Etxart bai Sarriegi / Herritarrak asko dira / Eta hau lan baten ondorio da / Gaurkoa ez da zoria / Herriko Plazan elkartu zaigu musikaren historia.