Albisteak

Ikurrina legeztatzearen 40. urtemuga gogoratuko du Zestoako Udalak

Zestoako Udalak honako ohar hau argitaratu du, ikurrinaren legeztatzearen 40. urtemugako ekitaldia iragarriz:

Duela 40 urte, 1977ko urtarrilaren 19an, ikurrina legeztatu egin zen Hego Euskal Herrian. Gerra garaitik, 40 urtean, erabat debekatuta egon zen eta etengabeko jazarpena pairatu zuen. Debeku hori zela-eta, ikurrina, jende askorentzat, bai abertzale nahiz abertzale ez zirenentzat ere, askatasuna, errebeldia, antifrankismoa eta demokraziaren ikur bilakatu zen. Horregatik, oso egun berezia izan zen, aspaldiko partez ikurrina udaletxetan, jendaurrean, erakutsi zenean.

1977ko urtarrilaren 19 hartan, Zestoako Udaletxeko balkoian ikurrina jarri zen momentuko irudiak jasota geratu ziren Jesus Izeta “Koiote” eta beste hainbat herritarri esker. Bestalde, orduan Udalbatza osatzen zutenetatik bost herritar oraindik bizi dira: Migel Iribar, Antonio Iriondo, Migel Larrañaga, Xabier Unanue eta Patxi Urbieta.

Hori guztia kontuan hartuta, Zestoako Udalak ikurrinaren legeztatzearen 40. urtemuga hori gogoratzea erabaki du eta bertara gonbidatzea egun hartan protagonista izan zirenak eta, jakina, herritar guztiak.

Ekitaldia oso xumea izango da. Lehendabizi, 19:00etan, ohiko Osoko Bilkura egingo da eta ondoren (19:30), alkateak, Udalbatzaren izenean, hitz batzuk esango ditu. Jarraian, aipatutako ikus-entzunezkoa proiektatuko da, ekitaldira hurbiltzen diren protagonistek aurkeztuta.

Ekitaldia amaitzeko, duela 40 urte bezala, Udalbatzak ikurrina altxatuko du udaletxeko balkoian. Ekitaldia irekia izango da eta gonbidapen zabala egiten dizuet bertan parte hartzera.

2017ko urtarrilak 17

Josetxo Mendizabal, alkatea




Irakurle, gure webgunean albiste hau irakurri baduzu, publizitate eta erakundeen diru laguntzez gain, urtero 30 euroko diru ekarpena egiten duten 350 bazkidetik gora ditugulako izan da. Mila esker bazkide! Herri eta auzoetako berri euskaraz emanez, normalizaziora bidean gure ekarpena egiten jarraitu nahi dugu. Proiektua sendotzen lagundu nahi baduzu, egin zaitez bazkide.

Egin zaitez bazkide