Albisteak

Lasaora ibilaldia eta bisita

— 2017-03-02

Zestoako kiroldegian urte askotan zehar ikusi izan dugu adineko jendea kirola egiten. Gaur egun ere adineko jendea astero elkartzen da kiroldegian, eta bertako langileek gidatuta ariketa fisikoa egiten dute.

Adineko jendeak hainbat ekimen egin izan ditu ariketa fisikoaren inguruan, Zestoa Osasuntsu izan da horietako bat. Horietaz gain, ekimen berriak ere sortzen dira, eta azken ekimena Gurutze Jubilatu Elkartearen eta Udalaren artean sortu dute. Asteazken goizean, Lasaora ibilaldia egin zuten, baina ibilaldi soila baino gehiago izan zen. Behin Lasaora iritsita, Santa Engraziako elojuaren berritze lanak nola doazen ikusi zuten eta Lasaoko Eliza ere bisitatu zuten.

Lasaoko egonaldia amaitzeko hamaiketakoa egin zuten eta ondoren bidegorritik Zestoara itzuli ziren. Mikel Irure kiroldegiko langileak azaldu digunez, “Lasaora egin dugun ibilaldia eta bertan ikusitakoa asko gustatu zaie parte hartzaileei eta aurrera begira ere antzeko ibilaldi gehiago egiteko asmoa daukagu”.

Irakurle, gure webgunean albiste hau irakurri baduzu, publizitate eta erakundeen diru laguntzez gain, urtero 30 euroko diru ekarpena egiten duten 350 bazkidetik gora ditugulako izan da. Mila esker bazkide! Herri eta auzoetako berri euskaraz emanez, normalizaziora bidean gure ekarpena egiten jarraitu nahi dugu. Proiektua sendotzen lagundu nahi baduzu, egin zaitez bazkide.

Egin zaitez bazkide