Albisteak

Lasaotik Iraetara arteko Urola ibaiko zaborrak bilduko ditu Udalak. Sei kilometroko ibilbidea izango da hain zuzen, eta sei tona inguru zabor jasotzea aurreikusten da. Erakundeak jakinarazi du proiektuaren helburu nagusia Urola ibaia “zaborrez garbi” geratzea dela. Horrekin batera komunikazio eta sentsibilizazio lan bat egitea ere aurreikusten dute, herritarrak “informatu” eta “sentikortzeko”. Eskualdeko beste hainbat herritan ere egingo dute garbiketa.

Eguzki Talde ekologistak “Sakabanatutako zaborren pilaketa fokuak prebenitzen eta zuzentzen lagunduko duten jarduketak egiteko” dirulaguntza lerroa aurkezteko eskaera egin zion Udalari. Erakundean Gipuzkoako Foru Aldundiko Ingurumeneko eta Obra Hidraulikoetako Departamentuari egin zion eskaera, eta 7.875 euroko laguntza jasoko du lan horiek egiteko.

Udalak azaldu du udazken eta neguko euriteekin “zabor ugari” agertu ohi dela ibai ertzean: “Honako hondakinak agertu dira: kable eta aparatu elektronikoak, gurpilak eta pneumatikoak, teilape zatiak, metalezko egiturak, paletak, gomak, poteak, tetrabrikak, arropa… Horiez gainera, zenbait eremuetan zabor fokoak ere identifikatzen ari da Udala Eguzki talde ekologistarekin elkarlanean: plastiko beltzak eta zuriak, burdinazko eta plastikozko sareak, oihalezko zakuak… Guzti horrek eragina du Urola ibaiko ekosisteman, baita Kantauri itsasoan ere”.

Ibaiaren garbiketa eremua (Argazkia: Zestoako Udala)